Родригонинг тиззасидан олган жароҳати 2023 йилдан бери мавжуд бўлганлиги аниқланди
Родриго «Реал Мадрид» ва Бразилия терма жамоасининг ҳужумчиси тиззасидан олган жароҳати 2023 йилдан бери мавжуд эканлиги аниқланди. У «Хетафе»га қарши ўйинда оғир жароҳат олиб, мавсумни якунлади. Тиббий текширувлар натижасида ўнг тиззасидаги боғламлар ва мениск узилгани маълум бўлди. Родригонинг жароҳати унинг 2026 йилги Жаҳон чемпионатида иштирок этишини хатарга солмоқда.
«Реал Мадрид» ва Бразилия терма жамоаси ҳужумчиси Родрйго «Хетафе»га қарши ўйинда тиззасидан оғир жароҳат олиб, мавсумни якунлади. Тиббий текширувлар 25 ёшли футболчининг ўнг тиззасидаги олдинги хочсимон боғламлари ва латерал мениски узилганини тасдиқлади. Бу ҳақда Goal.com хабар беради.
Маълум бўлишича, бразилиялик футболчи 2023 йилдан бери тиззасидаги қисман узилиш билан ўйнаб келган. Ўшанда клуб шифокорлари жарроҳлик амалиётидан воз кечиб, консерватив даволаш усулини танлашган эди.
Афсуски, февраль ойи бошидаги жароҳатидан сўнг майдонга қайтган ҳужумчининг тиззаси охирги баҳсда юкламага бардош бера олмади.
Родрйго ижтимоий тармоқларда ўз ҳис-туйғуларини ўртоқлашиб, бу кунни ҳаётидаги энг ёмон кунлардан бири деб атади. Футболчи доим ушбу жароҳатдан қўрққанини ва ҳозирги вазият унга нисбатан шафқатсизлик эканини таъкидлади.
Шунга қарамай, унинг вакиллари дастлабки танланган даволаш стратегиясини тўғри деб ҳисобламоқда.
«Реал Мадрид» таркибида бу 2023 йил ёзидан бери бешинчи шундай оғир жароҳатдир. Аввалроқ Куртуа, Алаба, Карвахал ва Милитао ҳам худди шундай муаммога дуч келган эди.
Родрйго энди камида 12 ой майдонга туша олмайди ва 2026 йили АҚШ, Канада ҳамда Мексикада ўтадиган Жаҳон чемпионатини ўтказиб юбориши мумкин.
Изоҳлар 0
…