Саудия Арабистони чемпионатининг шанба кунги учрашувида «Ал-Фейҳа» ўз майдонида «Ал-Наср»ни қабул қилди. Турнир пешқадами бўлиб турган меҳмонлар кўплаб нохуш вазиятларга қарамай, оғир кечган баҳсда ғалабани илиб кетди. Бу ҳақда euro-football.ru хабар беради.
Ўйин бошида Криштиану Роналду пеналтидан фойдалана олмади: унинг пастдан йўллаган зарбаси чап устунга тегиб, майдон ташқарисига чиқиб кетди. Биринчи бўлим якунида эса «Ал-Наср» ўз дарвозасига гол олиб келди — ўнг қанотдан узатилган тўпни дарвозабон илиб олишга чиққан пайтда ҳимоячи Абдуллела ал-Амри оёғи билан тўпни яқин бурчакка йўналтириб юборди (1:0).
Иккинчи бўлимда «Ал-Наср» босимни кучайтирди: Жоау Фелишнинг жарима майдонидаги зарбаси блокланди, қайтган тўпга Роналду 15 метрдан тепадан йўллаган зарбада дарвозабон жамоасини қутқариб қолди. 72-дақиқада эса Султон ал-Ганамнинг ўнг қанот бўйлаб узоқ узатмасидан кейин Кингсли Коман жарима майдонига ёриб кирди ва узоқ устунга пас узатди — Садио Мане ҳеч ким халақит бермаган ҳолда ҳисобни тенглаштирди (1:1).
Шундан сўнг Марсело Брозович шеригини дарвозабон билан яккама-якка чиқарди, бироқ Айман Яҳё имкониятдан фойдалана олмади. Кейин Брозовичнинг яна бир узатмасидан кейин Команнинг узоқ бурчакка йўллаган зарбаси ҳам дарвозабон томонидан қайтарилди. 80-дақиқада бурчак зарбасидан кейин тўп Фелишга келди, у 20 метрдан яқин устунга теккизди, тўп эса дарвозабон орқасига тегиб, дарвоза чизиғидан ўтди — (1:2) «Ал-Наср» олдинга чиқди.
Якуний зарбани 85-дақиқада Абдуллаҳ ал-Ҳамдан қўйди: Фелиш билан чап томондан жарима майдонига ёриб кирган ҳужумда у 8 метрдан аниқ зарба бериб, ҳисобни йирик кўринишга келтирди (1:3).
Натижада «Ал-Фейҳа» жадвалда 11-ўринни бўлишиб турибди, «Ал-Наср» эса энг яқин таъқибчисидан икки очко олдинда пешқадамликни сақлаб қолди.
“Zamin”ни Telegram'да ўқинг!
