Saudiya Arabistoni chempionatining shanba kungi uchrashuvida «Al-Feyha» o'z maydonida «Al-Nasr»ni qabul qildi. Turnir peshqadami bo'lib turgan mehmonlar ko'plab noxush vaziyatlarga qaramay, og'ir kechgan bahsda g'alabani ilib ketdi. Bu haqda euro-football.ru xabar beradi.
O'yin boshida Krishtianu Ronaldu penaltidan foydalana olmadi: uning pastdan yo'llagan zarbasi chap ustunga tegib, maydon tashqarisiga chiqib ketdi. Birinchi bo'lim yakunida esa «Al-Nasr» o'z darvozasiga gol olib keldi — o'ng qanotdan uzatilgan to'pni darvozabon ilib olishga chiqqan paytda himoyachi Abdullela al-Amri oyog'i bilan to'pni yaqin burchakka yo'naltirib yubordi (1:0).
Ikkinchi bo'limda «Al-Nasr» bosimni kuchaytirdi: Joau Felishning jarima maydonidagi zarbasi bloklandi, qaytgan to'pga Ronaldu 15 metrdan tepadan yo'llagan zarbada darvozabon jamoasini qutqarib qoldi. 72-daqiqada esa Sultan al-Ganamning o'ng qanot bo'ylab uzoq uzatmasidan keyin Kingsli Koman jarima maydoniga yorib kirdi va uzoq ustunga pas uzatdi — Sadio Mane hech kim xalaqit bermagan holda hisobni tenglashtirdi (1:1).
Shundan so'ng Marselo Brozovich sherigini darvozabon bilan yakkama-yakka chiqardi, biroq Ayman Yahyo imkoniyatdan foydalana olmadi. Keyin Brozovichning yana bir uzatmasidan keyin Komanning uzoq burchakka yo'llagan zarbasi ham darvozabon tomonidan qaytarildi. 80-daqiqada burchak zarbasidan keyin to'p Felishga keldi, u 20 metrdan yaqin ustunga tekkizdi, to'p esa darvozabon orqasiga tegib, darvoza chizig'idan o'tdi — (1:2) «Al-Nasr» oldinga chiqdi.
Yakuniy zarbani 85-daqiqada Abdullah al-Hamdan qo'ydi: Felish bilan chap tomondan jarima maydoniga yorib kirgan hujumda u 8 metrdan aniq zarba berib, hisobni yirik ko'rinishga keltirdi (1:3).
Natijada «Al-Feyha» jadvalda 11-o'rinni bo'lishib turibdi, «Al-Nasr» esa eng yaqin ta'qibchisidan ikki ochko oldinda peshqadamlikni saqlab qoldi.
“Zamin”ni Telegramʻda oʻqing!
