Мадриднинг "Реал Мадрид" клуби ўз етакчи футболчиларидан бири — Винисиус Жуниор билан янги узоқ муддатли шартнома бўйича деярли келишувга эришди. Томонлар ўртасидаги музокаралар якуний босқичга кирган бўлиб, ҳозирда фақат айрим техник ва молиявий тафсилотларни келишиб олиш қолган.
Бу ҳақда ишончли манбалардан бири — Sky Sports журналисти Флориан Плеттенберг ўзининг ижтимоий тармоқдаги саҳифаси орқали маълум қилди. Унинг айтишича, келишув принципиал жиҳатдан ҳал қилинган ва расмий эълон қилиниши яқин вақт масаласи.
Маълумотларга кўра, янги шартнома имзолангандан кейин ҳам жамоадаги энг юқори маош олувчи футболчи мақоми Килиан Мбаппеда сақланиб қолади. Франциялик суперюлдуз ҳозирда клубда йилига тахминан 32 миллион евро маош олаётган бўлса, Винисиуснинг амалдаги шартномасига кўра даромади 25 миллион евро атрофида экани айтилмоқда.
Аввалроқ ОАВларда бразилиялик қанот ҳужумчиси клубда энг юқори маош олувчи футболчига айланишни истагани ҳақида хабарлар тарқалган эди. Бироқ ҳозирги келишув шуни кўрсатмоқдаки, томонлар молиявий масалада ўзаро мақбул ечимга келган.
Винисиуснинг амалдаги шартномаси 2027 йил ёзига қадар амал қилади. Янги битим эса уни янада узоқ муддатга “қироллик клуби” билан боғлаб қўйиши кутилмоқда. Бу эса “Реал” раҳбариятининг келажак учун асосий фигуралардан бири сифатида айнан Винисиусга таянаётганини англатади.
Қисқаси, Мадрид клуби ўзининг ҳужум чизиғини узоқ йиллар давомида барқарор сақлаб қолиш йўлида муҳим қадам ташлаяпти. Энди эса барча эътибор — расмий эълонга қаратилган.
