Ўзбекистонда маданият ва санъат соҳасини янги босқичга олиб чиқишга қаратилган муҳим ташаббуслар амалга оширилмоқда. 2026 йил 1 июлдан бошлаб Қорақалпоғистон Республикаси, барча вилоятлар ҳамда Тошкент шаҳрида тажриба тариқасида ҳар бир ҳудудда биттадан “Маданият меҳмонхонаси” маданий кластерини барпо этиш режалаштирилган.
Ушбу инновацион лойиҳаларнинг асосий мақсади — ҳудудларда маданий ҳаётни фаоллаштириш, ижодкорларни қўллаб-қувватлаш ва аҳоли учун маданий хизматлар доирасини кенгайтиришдан иборат. “Маданият меҳмонхонаси” форматдаги кластерлар орқали санъат, ижод, таълим ва турли маданий тадбирлар учун замонавий ва қулай инфратузилма яратилиши кутилмоқда. Бу эса ўз навбатида янги истеъдодларни кашф этиш ва уларни ривожлантиришга хизмат қилади.
Шу билан бирга, таълим тизимида ҳам сезиларли янгиланишлар жорий этилмоқда. 2026–2027 ўқув йилидан бошлаб Республика мусиқа ва санъат техникуми ҳамда Республика эстрада ва цирк техникумида мутлақо янги касбий таълим дастурлари асосида ўқитиш йўлга қўйилади. Унга кўра, 2 йиллик бошланғич касбий таълим, 6 ойдан 2 йилгача бўлган ўрта касбий таълим ва камида 2 йиллик ўрта махсус касбий таълим босқичлари жорий этилади.
Бундан ташқари, ушбу таълим муассасаларида бакалавриат дастурлари билан уйғунлашган “2+2” шаклидаги таълим тизимига ҳам рухсат берилиши белгиланди. Бу формат талабаларга назарий билим билан бирга амалий кўникмаларни ҳам мустаҳкам ўзлаштириш имконини беради.
Қарор доирасида Маданият вазирлиги тизимидаги ихтисослаштирилган санъат мактабларига қабул тартиби ҳам аниқ белгилаб берилди. Энди ўқувчилар мусиқа йўналишига 5-синфдан, рақс, театр, халқ ижодиёти ҳамда тасвирий ва амалий санъат йўналишларига эса 9-синфдан қабул қилинади.
Ушбу мактабларда мактаб-интернатлар учун амал қилувчи имтиёзлар татбиқ этилади. Жумладан, таълим ва яшаш харажатлари давлат бюджети ҳисобидан қопланади, овқатланиш эса давлат ва ота-оналар маблағлари асосида молиялаштирилади.
Яна бир муҳим янгилик — мазкур таълим муассасалари битирувчиларига болалар мусиқа ва санъат мактабларида ўқитувчилик фаолияти билан шуғулланиш ҳуқуқи берилади. Бу эса соҳада кадрлар етишмовчилигини бартараф этиш ва ёш мутахассислар учун янги имкониятлар яратишга хизмат қилади.
Қисқаси, янги ташаббуслар нафақат маданият соҳасини жонлантиради, балки ижодий муҳитни кучайтириб, келажак авлод учун кенг имкониятлар эшигини очади.
“Zamin”ни Telegram'да ўқинг!
