Ливерпул ҳимоячиси Андрев Робертсон жамоанинг янги аъзолари Алехандер Исак ва Флориан Виртс атрофидаги танқидларга жавоб қайтарди. Шотландиялик футболчи ушбу ўйинчиларнинг Энфилддаги дебют мавсуми кутилганидек ўтмаган бўлса-да, келажакда улар клуб афсоналарига айланишига ишонч билдирди. Бу ҳақда Goal.com хабар беради.
Мерсисайдликлар таркибни янгилаш мақсадида Флориан Виртс учун 116 миллион фунт, Алехандер Исак учун эса Британия рекорди ҳисобланган 125 миллион фунт сарфлаган эди. Бироқ жамоанинг умумий ўйинидаги пасайиш ва беқарорлик сабабли ҳар икки ёш юлдуз ўзининг энг яхши формасини намойиш этишга қийналди. Робертсоннинг фикрича, трансфер суммасининг катталиги футболчиларга нисбатан адолатсиз босимни юзага келтирмоқда.
"Футболда мени энг кўп ғазаблантирадиган нарса — футболчилар ўз нархини ўзлари белгиламаслигидир. Бу бозордаги талаб ва таклифга боғлиқ. Мен машғулотларда ва ўйинларда уларнинг муносабатини кўриб турибман, улар Ливерпулда ажойиб карьера қуришларига шубҳам йўқ. Фақатгина уларга бироз вақт керак", — дея таъкидлади Робертсон.
Ҳозирда Ливерпул Англия Премер-лигасида кучли бешликка кириш учун кураш олиб бормоқда. Робертсон жамоа ўтиш даврини бошдан кечираётганини ва нафақат янги келганлар, балки тажрибали ўйинчилар ҳам ўз даражасидан пастроқ ҳаракат қилаётганини тан олди. Шунга қарамай, у клубнинг келажаги порлоқ эканига ишончи комил.
“Zamin”ни Telegram'да ўқинг!
