Криштиану Роналду Ал-Насср билан узоқ кутилган чемпионликка эришди

Кутиш якунланди. Криштиану Роналду ниҳоят мақсадига эришди ва Ал-Насср сафида Саудия Pro лигасида ғолиб чиқди. Бу хабар кўпчиликда шунчаки оддий ҳолдек таассурот қолдириши мумкин, аммо португалиялик юлдуз учун ушбу соврин ўзгача аҳамиятга эга эканлиги унинг ҳиссиётларидан яққол кўриниб турди. Бу ҳақда Goal.com хабар беради.

Футбол тарихидаги энг кўп соврин ютган ўйинчилардан бири, беш карра "Олтин тўп" соҳиби, Англия, Испания ва Италияда кўплаб чемпионликларни қўлга киритган Криштиану Роналду пайшанба оқшомида "Дамак" устидан қозонилган ҳал қилувчи ғалабани гўёки фаолиятидаги илк совриндек нишонлади. Бу қувонч кўз ёшларининг сабаби оддий: Роналдонинг клуб миқёсидаги саккизинчи чемпионлиги у учун энг қийин кечганларидан бири бўлди.

Роналдонинг 2023-йилда Яқин Шарққа кўчиб ўтиши фақат футбол билан боғлиқ эмас эди. Бу ўзаро манфаатли молиявий лойиҳа бўлиб, Португалия терма жамоаси сардорига рекорд даражадаги маош вада қилинган, Ал-Насср эса "Роналдо эффекти" орқали миллионлаб даромад олишни кўзлаган эди. Саудия Арабистони давлат инвестиция жамғармаси (ПИФ) томонидан қўллаб-қувватланган ушбу битим мамлакатнинг иқтисодий ва инфратузилмавий ислоҳотлари йўлидаги реклама лойиҳасининг бир қисми эди.

Криштиану Роналду ўз зиммасидаги вазифани аъло даражада уддалади. У нафақат майдонда голлар урди, балки Саудия Арабистонини дунёга тарғиб қилишда ҳам фаол бўлди. Унинг трансфери ортидан бошқа кўплаб жаҳон юлдузлари ҳам ушбу лигага келиб қўшилди. Бироқ, шунча голларга қарамай, жамоавий совриннинг йўқлиги Роналдони қийнаётган асосий масала эди.

Ниҳоят, узоқ давом этган омадсиз серия ва асабий ўйинлардан сўнг, Криштиану Роналду Ал-Насср билан чемпионлик кубогини боши узра баланд кўтарди. Бу ғалаба нафақат клуб учун, балки ўз амбицияларини ҳар доим юқори қўядиган 39 ёшли ҳужумчи учун ҳам ўзига хос тасдиқ бўлди.