Xiaomi kompaniyasi yirik maishiy texnika vositalari uchun moʻljallangan rasmiy MiCare kafolat dasturi ishga tushirilganini eʻlon qildi. Ushbu dastur konditsionerlar, muzlatkichlar, kir yuvish mashinalari va televizorlar uchun xizmat koʻrsatish muddatini sezilarli darajada uzaytirishga qaratilgan. Bu haqda Ixbt.com xabar beradi.
Yangi xizmat doirasida foydalanuvchilar oʻz qurilmalari uchun 10 yilgacha boʻlgan muddatga rasmiy kafolatni rasmiylashtirishlari mumkin. Bu foydalanuvchilarga uzoq muddatli foydalanish davomida kutilmagan nosozliklar va taʻmirlash xarajatlaridan himoyalanish imkonini beradi.
Kompaniya dasturning ishga tushirilishi munosabati bilan maxsus aksiya eʻlon qildi. 20-maydan 21-iyunga qadar MiCare xizmatiga ulanish uchun 50 foizgacha chegirmalar taqdim etiladi. Xizmat narxi atigi 54 yuandan boshlanishi belgilangan.
MiCare dasturi nafaqat bepul taʻmirlashni, balki ehtiyot qismlarni almashtirish va mutaxassislarning texnik koʻrigini ham oʻz ichiga oladi. Bu Xiaomi brendining oʻz mahsulotlari sifatiga boʻlgan ishonchini va mijozlarga gʻamxoʻrligini yana bir bor tasdiqlaydi.
“Zamin”ni Telegramʻda oʻqing!
