Stellantis konserni 2028-yildan boshlab Italiyada yangi turkumdagi ixcham va hamyonbop elektromobillarni ishlab chiqarishni rejalashtirmoqda. Ushbu loyiha doirasida afsonaviy Fiat Panda va Citroën 2CV modellarining zamonaviy elektrlashtirilgan talqinlari qayta tiklanishi kutilmoqda. Bu haqda Autocar.co.uk xabar beradi.
Yangi tashabbus Yevropa komissiyasining "E-car" dasturiga asoslangan bo'lib, u uzunligi 4,2 metrdan oshmaydigan M1E toifasidagi elektromobillar uchun maxsus imtiyozlarni nazarda tutadi. Ushbu qoidalar ishlab chiqaruvchilarga CO2 chiqindilari bo'yicha super-kreditlar olish imkonini beradi va kichik avtomobillar segmentini rivojlantirishga xizmat qiladi.
Stellantis bosh direktori Antonio Filosa Yevropa bozorida 15 ming yevrodan arzon avtomobillar yo'qligini sanoatdagi asosiy muammolardan biri deb atadi. Uning so'zlariga ko'ra, yangi loyiha aynan shu bo'shliqni to'ldirishga va shahar sharoitida qulay, ekologik toza transport vositalaridan foydalanishni ommalashtirishga qaratilgan.
Ishlab chiqarish jarayoni Italiyaning Pomigliano zavodida yo'lga qo'yiladi. Ayni paytda Fiat Panda va Alfa Romeo Tonale modellarini ishlab chiqarayotgan ushbu zavod yiliga 300 mingtagacha avtomobil tayyorlash quvvatiga ega. Yangi elektromobillar STLA City platformasida barpo etiladi.
“Zamin”ni Telegramʻda oʻqing!
