O‘zatom agentligi hamda Muroosystems Corporation O‘zbekistonda innovatsion va strategik ahamiyatga ega yangi data-markaz loyihasi ustida ish boshladi. Ushbu loyiha zamonaviy raqamli infratuzilmani tubdan o‘zgartirishi mumkin bo‘lgan noodatiy yondashuvni taklif qiladi: data-markaz to‘liq atom energiyasi, aniqrog‘i, kichik modulli reaktorlar orqali ishlab chiqariladigan elektr bilan ta’minlanadi.
Loyiha doimiy va bashorat qilinadigan 50 megavatt quvvatga mo‘ljallangan. Bugungi kunda data-markazlar internet, bank tizimlari, bulutli servislar va sun’iy intellekt kabi ko‘zga ko‘rinmas, ammo hayot uchun hal qiluvchi infratuzilmaning asosini tashkil qiladi. Shu bilan birga, ular ulkan hajmda va uzluksiz elektr energiyasi talab qiladi.
Aynan shu nuqtada an’anaviy “yashil energiya” yetarli emas. Quyosh botishi yoki shamol to‘xtashi mumkin, ammo serverlar to‘xtamay ishlashi shart. Taklif etilayotgan yechim esa aynan shu muammoni hal qiladi. Kichik modulli reaktorlar ixcham, sodda va iste’molchiga yaqin joylashtirish imkoni bilan ajralib turadi. Natijada ishlab chiqarilgan energiya to‘g‘ridan to‘g‘ri data-markaz ehtiyojlariga yo‘naltiriladi.
Bu yondashuv data-markazlar uchun asosiy omil — barqarorlik va uzluksizlikni ta’minlaydi. Atom energiyasi “doimiy generatsiya” manbai sifatida raqamli iqtisodiyot uchun ishonchli tayanch bo‘lishi mumkin.
Agar ushbu tashabbus muvaffaqiyatli amalga oshsa, kichik modulli reaktorlar faqat shaharlar yoki sanoat uchun emas, balki yuqori texnologiyali obyektlar uchun ham eng maqbul yechim ekanini isbotlaydi. Kelgusida data-markazlar qayerda qurilishi haqidagi tasavvurlar ham o‘zgarishi mumkin — ular endi energiya manbai atrofida joylashadi.
E’tiborli jihati, mazkur loyiha atom energetikasi va raqamli iqtisodiyot tutashgan nuqtadagi muhim tajriba sifatida qaralmoqda. U internet infratuzilmasini ham elektr stansiyalari kabi barqaror, aniq va muhandislik jihatdan tushunarli tizimga aylantirish mumkinligini amalda ko‘rsatib berishi kutilmoqda.
Ma’lum qilinishicha, ushbu data-markaz loyihasi Shavkat Mirziyoyev va Yaponiya Bosh vaziri Sanaye Takaychi o‘rtasida Tokioda bo‘lib o‘tgan muzokaralar davomida erishilgan kelishuvlar paketiga kiritilgan. Bu esa loyihaning xalqaro ahamiyati va strategik kelajagidan darak beradi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
