O‘zbekiston va Yaponiya o‘zaro yangi investitsion platforma yaratishga kelishib oldilar. Ushbu platforma doirasida umumiy qiymati 12 milliard AQSh dollaridan oshiq bo‘lgan kooperatsion loyihalar amalga oshiriladi.
Tashabbus Tokio shahrida O‘zbekiston Prezidenti Shavkat Mirziyoyev va Yaponiya Bosh vaziri Sanae Takaichi o‘rtasida bo‘lib o‘tgan muzokaralarda ilgari surildi. Yangi platforma ikki davlat o‘rtasidagi yirik loyihalarni yanada tezroq amalga oshirish va Yaponiya sarmoyalarini O‘zbekiston iqtisodiyotiga jalb qilish jarayonini soddalashtirishga qaratilgan.
Bu yondashuv alohida loyihalarni moliyalashtirishdan uzoq muddatli va tizimli investitsion hamkorlikka o‘tishni nazarda tutadi. Muzokaralar davomida qayd etilishicha, tashrif davomida shakllantirilgan loyihalar portfeli energetika, sanoat, transport, infratuzilma, ta’lim va boshqa ustuvor sohalarni qamrab oladi.
Investitsion platformani yaratishda Yaponiya xalqaro hamkorlik agentligi (JICA) va Yaponiya xalqaro hamkorlik banki (JBIC) ishtirok etadi. Ushbu tashkilotlar O‘zbekistondagi qator loyihalarda allaqachon faol qatnashib kelmoqda.
Kutilishicha, yangi platforma yapon investorlar uchun xavflarni kamaytirib, O‘zbekiston bozorida faoliyat yuritish sharoitlarini yanada barqaror va aniq qiladi. Asosan «yashil» energetika, sanoatni modernizatsiya qilish va yuqori texnologiyalar sohalaridagi yirik tashabbuslarni moliyalashtirish uchun «soyabon» mexanizmi shakllantiriladi.
Shuningdek, Yaponiya nafaqat alohida loyihalarda ishtirok etishga, balki O‘zbekistonning uzoq muddatli iqtisodiy rivojlanish dasturlariga chuqurroq integratsiyalashishga ham qiziqish bildirayotgani ta’kidlandi. O‘z navbatida, Toshkent yangi format orqali mamlakatga qo‘shimcha texnologik va boshqaruv ko‘nikmalarini jalb qilishga umid qilmoqda.
Mazkur investitsion platforma bo‘yicha kelishuv ikki davlat o‘rtasida strategik sheriklikni kengaytirish bo‘yicha Qo‘shma Bayonotda mustahkamlangan bo‘lib, tashrif natijasidagi keng qamrovli kelishuvlarning bir qismi hisoblanadi. Bundan avval Shavkat Mirziyoyev Tokioda bo‘lib o‘tgan sammitda Markaziy Osiyo davlatlari va Yaponiya o‘rtasidagi hamkorlik tashabbuslarini ilgari surgan edi.
Mehmon guruhidagi foydalanuvchilar ushbu nashrga izoh qoldira olmaydi.
