La Liganing 23-turida «Vilyarreal» o'z maydonida «Espanol»ni 4:1 hisobida yengdi. Uchrashuv g'ayrioddiy kechdi: 87-daqiqaga qadar har ikki jamoa darvozasi tomon bor-yo'g'i uchta aniq zarba yo'llagan bo'lsa-da, tablodagi hisob 4:0 edi. Bu haqda euro-football.ru xabar beradi.
Bahs boshida mehmonlar gol urgandek tuyuldi: Tayris Dolanning chap qanotdan uzatmasini Omar el-Xilali yaqin masofadan darvozaga joyladi, biroq hujumdagi qoida buzilishi qayd etilib, gol bekor qilindi. 35-daqiqada «Vilyarreal» hisobni ochdi — chap tomondan uzatilgan to'pni Tejjon Byukenen sherigiga tushirib berdi, Jorj Mikautadze esa burilib, tepib, to'pni o'ng yuqori burchakka yo'lladi.
Ko'p o'tmay mezbonlar yana zarba berdi: Alberto Moleyro jarima maydoniga yorib kirib markazga uzatma berdi, to'pni qaytarishga urinayotgan Xose Salinas esa uni o'z darvozasiga kiritib yubordi. Ikkinchi bo'lim boshida Moleyro markazdan Nikolya Pepeni hujumga chiqarib yubordi — Pepe jarima maydonida chaproqqa siljib, 15 metrdan pastdan aniq zarba bilan hisobni yiriklashtirdi.
55-daqiqada «Vilyarreal» to'rtinchi golni urdi: Mikautadzedan pas olgan Moleyro 12 metrdan uzoq burchakka aniq tepdi. Yakunda «Espanol» bitta gol bilan javob qaytardi — Sharl Pikelning burchakdan uzatmasini Leandro Kabrera bosh bilan darvozaga yo'naltirdi.
Ushbu g'alabadan so'ng «Vilyarreal» turnir jadvalida uchinchi o'rindagi «Atletiko»ga ochkolar bo'yicha yetib oldi. «Espanol» esa ketma-ket to'rtinchi mag'lubiyatini qabul qilib, oltinchi pog'onada qoldi.
“Zamin”ni Telegramʻda oʻqing!
