Smartfonlar koʻplab ilovalar va tinimsiz bildirishnomalar tufayli diqqatni jamlashga xalaqit berishi mumkin. Poppy nomli yangi ilova taqvim, elektron pochta, xabarlar va boshqa manbalarni yagona boshqaruv paneliga birlashtirib, ushbu tartibsizlikni bartaraf etishni maqsad qilgan. Kompaniya taʼkidlaganidek, Poppy sizning oʻrningizga barcha muhim maʼlumotlarni kuzatib boradi. Bu haqda Techcrunch.com xabar beradi.
Ilova foydalanuvchining elektron pochta, taqvim va joylashuv kabi maʼlumotlarini sunʼiy intellekt yordamida tahlil qilib, ayni damda nima muhimligini aniqlaydi. Masalan, agar taqvimingizda boʻsh vaqt boʻlsa va siz park yaqinida boʻlsangiz, Poppy sizga sayr qilishni taklif qilishi mumkin. Shuningdek, u doʻstlaringiz bilan uchrashuvlarni rejalashtirishda ularning didi va xohishlarini hisobga olgan holda restoranlar tavsiya etadi.
Poppy shaxsiy yordamchi kabi ishlaydi: u parvozlarni kuzatib boradi, jadval oʻzgarishlari haqida ogohlantiradi yoki dori ichish vaqti kelganini eslatadi. Ilova asoschisi Sai Kambampati inson va kompyuter oʻzaro taʼsirini yangi bosqichga olib chiqishni maqsad qilgan. Uning soʻzlariga koʻra, zamonaviy sunʼiy intellekt texnologiyalari kompyuterlarga foydalanuvchi ehtiyojlarini oldindan sezish imkonini bermoqda.
Hozirgi vaqtda Poppy Apple Calendar, Google Calendar, Gmail, Outlook, iCloud Mail, Apple Health, iMessage va WhatsApp kabi mashhur xizmatlar bilan integratsiyalashgan. Shuningdek, Uber va Instacart ilovalari bilan ham ishlaydi. Maxfiylikni taʼminlash maqsadida foydalanuvchi maʼlumotlari shifrlanadi va bulutli LLM modellaridan foydalanilganda maʼlumotlarni saqlamaslik siyosati qoʻllaniladi.
“Zamin”ni Telegramʻda oʻqing!
