Vivo kompaniyasi hamyonbop narxdagi, 5G tarmogʻini qoʻllab-quvvatlovchi yangi Vivo Y60 smartfonini namoyish etdi. Qurilma oʻzining narx segmenti uchun noodatiy boʻlgan 120 Hz yangilanish tezligiga ega 6,74 dyuymli LCD displey bilan jihozlangan. Bu haqda Ixbt.com xabar beradi.
Smartfon asosi sifatida Snapdragon 4 Gen 2 protsessori tanlangan. Foydalanuvchilarga 6 yoki 8 GB tezkor xotira hamda 256 GB gacha boʻlgan ichki xotira variantlari taklif etiladi. Qurilma Android 16 bazasidagi OriginOS 6 operatsion tizimida ishlaydi.
Yangi modelning asosiy afzalligi — 6500 mA/soat sigʻimli ulkan batareyadir. U 15 vattli quvvatlashni va boshqa qurilmalarni quvvatlantirish funksiyasini qoʻllab-quvvatlaydi. Kamera imkoniyatlari esa 13 MP asosiy va 5 MP old sensorlar bilan cheklangan.
Qurilma qoʻshimcha qulayliklar, jumladan, 3,5 mm audio tirqishi, IQ-uzatgich, yon tomonga oʻrnatilgan barmoq izi skaneri va USB-C porti bilan taʼminlangan. Shuningdek, IP65 standarti boʻyicha namlikdan himoya va SGS sertifikati mavjud.
Vivo Y60 smartfonining boshlangʻich narxi taxminan 1799 yuanni (qariyb 265 dollar) tashkil etadi.
“Zamin”ni Telegramʻda oʻqing!
