Mavsum yakuniga yaqinlashar ekan, Bavariya sardori Manuel Neuer yana diqqat markazida. 40 yoshli darvozabon faoliyatini yana bir yilga uzaytirish boʻyicha klub rahbariyati bilan kelishuvga erishgani xabar qilinmoqda. Fabrizio Romano va Sky nashrlarining maʼlumotlariga koʻra, tomonlar shartnoma shartlarini kelishib olgan va yaqin kunlarda rasmiy imzolash marosimi boʻlib oʻtadi. Bu haqda Goal.com xabar beradi.
Neuer ushbu shartnoma doirasida yillik maoshini qisqartirishga rozi boʻlgan. Klub faxriy prezidenti Uli Xyones ham tajribali posbonning jamoada qolishini qoʻllab-quvvatlab, uning Bavariya uchun hali ham muhim ekanligini taʼkidladi. Jamoaning ikkinchi darvozaboni Jonas Urbig esa Neuer qoʻl ostida oʻz mahoratini oshirishda davom etadi.
Neuerning ajoyib oʻyinlari muxlislarda uning Germaniya terma jamoasiga qaytishi mumkinligi haqidagi umidlarni uygʻotdi. Biroq, darvozabon terma jamoadagi faoliyatini yakunlaganini va diqqatini faqat Bavariyaga qaratganini bir necha bor taʼkidladi. U Chempionlar ligasi doirasidagi Real Madridga qarshi bahsdan soʻng ham bu mavzuga qaytmasligini bildirgan edi.
Germaniya terma jamoasi bosh murabbiyi Julian Nagelsmann ham Neuerning qarorini hurmat qilishini va terma jamoa tarkibi boʻyicha boshqa rejalar bilan ishlayotganini qayd etdi. Shunday qilib, afsonaviy darvozabon oʻz faoliyatining soʻnggi yillarini Myunxen klubida oʻtkazishga qaror qildi.
“Zamin”ni Telegramʻda oʻqing!
