Angliya Liga kubogining final bosqichida «Arsenal» hamda «Manchester Siti» o‘rtasidagi hal qiluvchi to‘qnashuv o‘z yakuniga yetdi. Kutilganidek, keskin va intrigali kechishi kutilgan bellashuvda Pep Gvardiola shogirdlari raqibidan ustun kelib, 2:0 hisobida g‘alaba qozondi va navbatdagi sovrinni o‘z hisoblariga qo‘shib qo‘ydi.
Uchrashuvning birinchi bo‘limi nisbatan teng kurashlar ostida o‘tgan bo‘lsa, ikkinchi taymda «shaharliklar» o‘yinni o‘z nazoratiga oldi. 60-daqiqada Niko O’Rayli hisobni ochib, jamoasini oldinga olib chiqdi. Oradan atigi to‘rt daqiqa o‘tib, o‘sha futbolchining o‘zi yana bir bor aniq zarba bilan darvoza yo‘lini topdi va dubl muallifiga aylandi. Shu tariqa o‘yin taqdiri qisqa vaqt ichida hal bo‘ldi.
«Arsenal» tarkibida Kepa, Saliba, Gabriel, Saka va boshqa yetakchi futbolchilar harakat qilgan bo‘lsa-da, ular «Siti»ning jips va muvozanatli o‘yiniga qarshi munosib javob topa olmadi. Hujumda imkoniyatlar bo‘lganiga qaramay, ularni golga aylantirishda aniqlik yetishmadi.
«Manchester Siti» safida esa Abduqodir Husanov markaziy himoyada ishonchli o‘yin namoyish etib, jamoa muvaffaqiyatiga hissa qo‘shdi. Jamoa tarkibida Rodri, Bernardu Silva, Dok-u va Xoland kabi yulduzlar ham faol harakat qilib, raqibga bosim o‘tkazishda muhim rol o‘ynashdi.
"Arsenal" – "Manchester Siti" 0:2
Gollar: 60, 64 - Niko O’Rayli
"Arsenal": 13. Kepa Arrisabalaga, 4. Ben Uayt (9. Gabriel Jezus, 82’), 2. Vilyam Saliba, 6. Gabriel Magalyayns, 5. Pero Inkape (33. Rikkardo Kalafori, 65’), 36. Martin Subimendi, 41. Deklan Rays, 19. Leandro Trossard (11. Gabriel Martinelli, 82’), 7. Bukayo Saka, 14. Viktor Yokeresh, 29. Kay Xavers (20. Noni Madueke, 65’).
"Manchester Siti": 1. Jeyms Trafford, 27. Mateus Nunes, 45. Abduqodir Husanov, 33. Niko O’Rayli, 6. Natan Ake, 20. Bernardu Silva, 16. Rodri, 11. Jeremi Dok-u, 10. Rayan Sherki (47. Fil Foden, 90+1’), 9. Erling Holand, 42. Antuan Semeno.
Ogohlantirishlar: 16 - Pero Inkape, 32 - Abduqodir Husanov, 51 - Kepa Arrisabalaga. 69 - Ben Uayt.
Shu tariqa, «Manchester Siti» o‘z tarixida 9-marta Angliya Liga kubogini qo‘lga kiritdi. Bu g‘alaba nafaqat jamoa uchun, balki muxlislar uchun ham katta bayramga aylandi.
Final yana bir narsani ko‘rsatdi: «Siti» hozirgi paytda faqat g‘alaba uchun yashaydigan mashinaga aylangan. Agar shu temp saqlansa, ularni to‘xtatish — aytishga oson, qilishga esa ancha qiyin masala.
“Zamin”ni Telegramʻda oʻqing!
