Inter sardori Lautaro Martinez o‘z kelajagini aynan Milan klubi bilan bog‘lashini va faoliyatini shu yerda yakunlash niyatida ekanligini ma’lum qildi. Argentinalik hujumchi unga qiziqish bildirayotgan Barselona kabi jamoalarning takliflariga qaramay, Inter tarkibini tark etishni istamasligini ta’kidladi. Bu haqda Goal.com xabar beradi.
2018-yildan buyon jamoa sharafini himoya qilib kelayotgan 28 yoshli futbolchi, agar klub rahbariyati uni jamoadan haydab yubormasa, faoliyatining oxirigacha shu yerda qolishini aytdi. U shuningdek, futbolchilik faoliyatini yakunlagach, sport olamidan butunlay ketishini va murabbiylik yoki boshqa sohalarda qolish niyati yo‘qligini qo‘shimcha qildi.
Barselona klubi Julian Alvarez transferi amalga oshmagach, Lautaro Martinez variantini ko‘rib chiqqan edi. Biroq, futbolchining 2024-yil avgust oyida imzolagan va 2029-yilgacha mo‘ljallangan yangi shartnomasi hamda uning klubga bo‘lgan sadoqati bu transferni imkonsiz qilib qo‘ydi.
Joriy mavsumda A Seriyada chempionlikni qo‘lga kiritgan Inter tarkibida Lautaro 29 ta o‘yinda 17 ta gol urib, 6 ta golli uzatmani amalga oshirdi. Jamoa sardorining bu bayonoti yozgi transfer oynasi oldidan muxlislar va rahbariyat uchun katta xotirjamlik bag‘ishladi.
“Zamin”ni Telegramʻda oʻqing!
