“Manchester Siti” joriy mavsumda Angliya ligasi kubogi va Angliya kubogini qo‘lga kiritib, mamlakat chempionligi uchun ham kurashni davom ettirmoqda. Shunday muvaffaqiyatli mavsum fonida klub yilning eng yaxshi futbolchisini aniqlash uchun muxlislar o‘rtasida ovoz berish jarayonini tashkil qildi.
Birinchi bosqich natijalariga ko‘ra, eng ko‘p ovoz olgan uch futbolchi yakuniy ro‘yxatga kiritildi. Ular — Jeremi Doku, Niko O'Rayli va O‘zbekiston milliy jamoasi himoyachisi Abduqodir Husanov. Quvonarlisi, o‘zbekistonlik futbolchi “Manchester Siti”dek yulduzli klubda mavsumning eng zo‘ri bo‘lish uchun kurashmoqda.
Klubning ijtimoiy tarmoqlarida muxlislar bildirgan fikrlarga nazar tashlansa, ularning katta qismi aynan Husanovni ushbu sovringa munosib deb hisoblamoqda. Fanatlar o‘zbek himoyachisining barqarorligi, bosim ostidagi xotirjamligi va himoya chizig‘idagi ishonchli harakatlarini alohida ta’kidlashmoqda.
Aziz Muslimov fikricha, Husanov yosh himoyachilarda kam uchraydigan sifatlarni ko‘rsatmoqda. U faqat raqib hujumlarini to‘xtatmaydi, balki maydonni o‘qiydi, xavfni oldindan sezadi va og‘ir vaziyatlarda ham sovuqqon qoladi. “Siti” tizimida bunday fazilatlar himoyachini oddiy iqtidordan katta figuraga aylantiradi.
Ayrim muxlislar Dokuning hujumdagi ta’sirini, O'Raylining kashfiyotga aylanganini e’tirof etsa-da, Husanovning himoyadagi roli hal qiluvchi bo‘lganini ta’kidlamoqda. “Bu safar himoyachi g‘olib bo‘lishi kerak”, degan fikrlar ham ko‘p uchramoqda.
Fanatlardan biri Abduqodir “Manchester Siti”ning ilk mavsumidayoq jamoa himoyasini ushlab turganini, ikki sovrin yutishda katta hissa qo‘shganini aytdi. Boshqa bir muxlis esa uni “yashirin qahramon” deb atadi. Bu ta’rif Husanovning maydondagi mehnati har doim ham shovqinli bo‘lmasa-da, juda muhim ekanini ko‘rsatadi.
Yana bir qiziq jihat — muxlislar Husanovning “Chelsi”ga qarshi dastlabki o‘yinidagi xatosidan keyin deyarli adashmaganini alohida ta’kidlashmoqda. Bu esa futbolchining psixologik jihatdan qanchalik tez o‘sganini, bosimni yengib o‘ta olganini ko‘rsatadi.
Eslatib o‘tamiz, Abduqodir Husanov mavsum davomida ikki bor — yanvar va mart oylarida “Manchester Siti”ning oyning eng yaxshi futbolchisi deb topilgan edi. Endi esa u butun mavsum yakunlari bo‘yicha klubning eng yaxshi o‘yinchisi bo‘lish uchun da’vogarlar qatorida turibdi.
Qisqasi, Abduqodir Husanov “Manchester Siti”dagi ilk katta mavsumida muxlislar ishonchini qozonishga ulgurdi. Doku shou ko‘rsatdi, O'Rayli kashfiyot bo‘ldi, ammo Husanov himoyada barqarorlik va ishonch ramziga aylandi. Endi so‘nggi so‘z muxlislarda: agar ovozlar kayfiyatga mos tushsa, o‘zbek himoyachisi Angliyada katta e’tirofga sazovor bo‘lishi mumkin.
“Zamin”ni Telegramʻda oʻqing!
