Real Madrid prezidenti Florentino Pérez boʻlajak saylovlarda jiddiy raqobatga duch kelishi kutilmoqda. Cox energetika kompaniyasi rahbari, tadbirkor Enrique Riquelme klub saylov qoʻmitasiga rasmiy xat yoʻllab, oʻz nomzodini qoʻyishini tasdiqladi. Riquelme amaldagi prezidentga qarshi chiqadigan birinchi rasmiy nomzod boʻlishi mumkin. Bu haqda Goal.com xabar beradi.
Nomzodlikni rasmiylashtirish uchun daʼvogarlar kamida 20 yillik klub aʼzoligiga ega boʻlishi va yillik byudjetning 15 foiziga teng boʻlgan 187 million yevrolik kafolat mablagʻini taqdim etishi lozim. Agar barcha talablar bajarilsa, klub aʼzolari oʻrtasida ovoz berish jarayoni tashkil etiladi. Hozirda nomzodlarni roʻyxatga olish muddati 23-mayga qadar davom etadi.
El Confidencial nashrining xabar berishicha, Riquelme saylovchilarni oʻziga ogʻdirish uchun ikkita yirik transfer rejasini tayyorlab qoʻygan. Uning birinchi maqsadi Manchester Siti hujumchisi Erling Xolandni Madridga olib kelishdir. Maʼlumotlarga koʻra, tadbirkor allaqachon norvegiyalik futbolchining vakillari bilan aloqaga chiqqan.
Riquelmening ikkinchi asosiy rejasi murabbiylik oʻrindigʻi bilan bogʻliq. U hozirda Red Bull tizimida faoliyat yuritayotgan Jürgen Kloppni jamoaga taklif qilmoqchi. Bu reja yaqin vaqtgacha Real Madrid boshqaruviga qaytishi kutilayotgan José Mourinho variantini soʻroq ostida qoldirishi mumkin.
Florentino Pérez esa matbuot anjumanida oʻziga nisbatan "tuhmat kampaniyasi" uyushtirilayotganini taʼkidladi. Real Madrid 2009/10-yilgi mavsumdan beri ilk bor ketma-ket ikki yilni sovrinsiz yakunladi. Bu esa klub ichidagi siyosiy kurashning yanada keskinlashishiga sabab boʻlmoqda.
“Zamin”ni Telegramʻda oʻqing!
