Orbit Fab va Thales Alenia Space kompaniyalari elektr dvigatelli sunʻiy yoʻldoshlarni bevosita orbitada yonilgʻi bilan toʻldirish imkoniyatlarini oʻrganish boʻyicha qoʻshma loyihani boshladi. Buyuk Britaniya koinot agentligi (U.K. Space Agency) tomonidan qoʻllab-quvvatlanayotgan ushbu tashabbus Yevropaning koinot apparatlariga xizmat koʻrsatish infratuzilmasini rivojlantirish va koʻp marta foydalaniladigan tizimlarni yaratish strategiyasining bir qismidir. Bu haqda Ixbt.com xabar beradi.
Refuelable Electric Engine Flatsat deb nomlangan loyiha har ikki kompaniyaning Britaniyadagi jamoalari tomonidan amalga oshiriladi. Hamkorlik doirasida Orbit Fab tomonidan ishlab chiqilgan RAFTI (Rapidly Attachable Fluid Transfer Interface) interfeysini Thales Alenia Space elektr dvigatellari, xususan, ksenonli Xoll dvigatellari bilan integratsiya qilishga asosiy eʻtibor qaratiladi.
RAFTI interfeysi sunʻiy yoʻldoshlarni orbital omborlar yoki xizmat koʻrsatuvchi apparatlarga ulash uchun moʻljallangan maxsus port hisoblanadi. Avvalroq ushbu texnologiya AQSH Koinot kuchlari (U.S. Space Force) tomonidan harbiy sunʻiy yoʻldoshlarda, jumladan, gidrazin oʻtkazish boʻyicha demonstratsion missiyalarda foydalanish uchun maʻqullangan edi.
Texnologiyani sinovdan oʻtkazish uchun loyiha ishtirokchilari “flatsat” — maxsus yerusti sinov stendini yaratadilar. Ushbu stend parvoz namunasi yigʻilgunga qadar sunʻiy yoʻldosh tugunlarining ishlashini tekshirish, ishchi suyuqlikni uzatish jarayonlarini mashq qilish va elektr dvigatelli apparatlarni yonilgʻi bilan toʻldirish konsepsiyalarini oʻrganish imkonini beradi.
Mazkur ishlanma sunʻiy yoʻldoshlarning xizmat muddatini uzaytirish va koinot apparatlarining manyovr qilish imkoniyatlarini kengaytirishga qaratilgan. Bu yoʻnalish hozirgi kunda Yevropa koinot sektori rivojlanishining eng muhim vektorlaridan biriga aylanib bormoqda.
“Zamin”ni Telegramʻda oʻqing!
