Kaliforniya rasmiylari Linux hamjamiyati, open-source dasturchilari va shaxsiy maʻlumotlar himoyachilarining tanqidlaridan soʻng soʻnggi yillardagi eng bahsli IT-qonunlaridan birini yumshatishni boshladi. Yangi AB 1856 qonun loyihasi ochiq kodli operatsion tizimlarning aksariyat qismini Digital Age Assurance Act qonunida koʻzda tutilgan foydalanuvchilar yoshini majburiy tekshirish talablaridan ozod qilishni taklif etmoqda. Agar tuzatishlar qabul qilinsa, Debian, Fedora, Ubuntu, Arch Linux va Linux Mint kabi deyarli barcha ommabop distributivlar yangi qoidalardan mustasno boʻladi. Bu haqda Ixbt.com xabar beradi.
Dastlabki AB 1043 qonuniga koʻra, yoshni verifikatsiya qilish masʻuliyati sayt va ilovalardan operatsion tizim darajasiga oʻtkazilishi kerak edi. Rejaga koʻra, operatsion tizim qurilmani birinchi marta sozlash vaqtida foydalanuvchining yoshini soʻrashi va keyinchalik ilovalarga maxsus "yosh signali"ni uzatishi lozim edi. Biroq, iOS yoki Android tizimlaridan farqli oʻlaroq, Linux distributivlari markazlashgan tijorat kompaniyalariga tegishli emas va koʻpincha yagona yuridik egasiga ham ega emas.
Electronic Frontier Foundation (EFF) kabi raqamli huquqlarni himoya qiluvchi tashkilotlar ushbu tashabbusni keskin tanqid qilib, u internetda foydalanuvchilarni ommaviy kuzatish uchun xavfli poydevor yaratishini taʻkidladi. Yangi tahrirdagi AB 1856 loyihasi foydalanuvchilarga dasturiy taʻminotni erkin nusxalash, oʻzgartirish va tarqatish imkonini beruvchi litsenziyalar asosidagi loyihalarni qonun doirasidan chiqarishni taklif qilmoqda.
Shunga qaramay, oʻz ilovalar doʻkoniga ega boʻlgan tijorat ekotizimlari hali ham qonun talablari ostida qolishi mumkin. Masalan, Valve kompaniyasining SteamOS tizimi Linux asosida yaratilgan boʻlsa-da, u Steam doʻkoni bilan chambarchas bogʻlangan. Shu sababli, regulyatorlar uni klassik open-source distributivi emas, balki iOS yoki Android analogi sifatida koʻrishlari mumkin. Oʻzgarishlar 2027-yil 1-yanvardan kuchga kirishi kutilmoqda.
“Zamin”ni Telegramʻda oʻqing!
