TechPowerUp nashri mutaxassislari yangi 007: First Light oʻyinida 30 dan ortiq videokartalarni sinovdan oʻtkazishdi. OAV va geymerlar tomonidan iliq kutib olingan ushbu loyiha AMD mahsulotlari uchun kutilmagan darajada yaxshi optimizatsiya qilingani maʼlum boʻldi. Dasturiy taʼminot darajasidagi ayrim kamchiliklarga qaramay, Radeon kartalari oʻzining bevosita raqobatchilaridan sezilarli darajada oʻzib ketmoqda. Bu haqda Ixbt.com xabar beradi.
Xususan, 1440p ruxsatida Radeon RX 9070 modeli nafaqat RTX 5070 kartasini ortda qoldirdi, balki RTX 5070 Ti koʻrsatkichlariga yaqinlashdi. Eʼtiborli jihati shundaki, ushbu modellar oʻrtasidagi narx farqi deyarli ikki baravarni tashkil etadi. Shuningdek, oʻtgan avlodga mansub RX 7900 XTX modeli hatto yangi RTX 5080 dan ham yuqoriroq samaradorlik namoyish etgan.
4K formatida NVIDIA kartalari biroz yaxshiroq natija koʻrsatsa-da, RTX 40 seriyasida tushunarsiz pasayishlar kuzatilmoqda. Masalan, RTX 4070 modeli hatto eski RTX 3070 dan kuchsizroq natija qayd etdi va arzon RX 9060 8GB modeliga imkoniyatni boy berdi. Umuman olganda, oʻyinning optimizatsiyasi yomon emas: Full HD ruxsatida RTX 3060 kartasi 40 k/s dan yuqori, RTX 3060 Ti esa barqaror 60 k/s tezlikni taʼminlay oladi.
Yuqori sifatli 1440p ruxsatida 60 k/s tezlikka erishish uchun RX 7700 XT yoki RTX 4070 darajasidagi kartalar talab etiladi. 4K ruxsatida esa yuklama keskin ortadi — hatto RTX 5080 ham maksimal sozlamalarda, upskayler va kadrlar generatorisiz taxminan 60 k/s atrofida natija beradi. Bu natijalar oʻyinning vizual sifati va texnik talablari oʻrtasidagi muvozanatni koʻrsatib bermoqda.
“Zamin”ni Telegramʻda oʻqing!
