Миллий истиқболли лойиҳалар агентлиги (МИЛА) Global Insurance суғурта компаниясининг лицензиясини 6 ой муддатга тўхтатди. Бу ҳақда агентлик расмий веб-сайтида эълон қилинди.
Агентлик қарори 8-ноябрдан бошлаб кучга кирди. Компания амалдаги шартномаларни бажаришда давом этади, бироқ янги шартномалар тузиш ёки эски шартномаларни узайтириш имкониятига эга бўлмайди.
Октябр ойида МИЛА Global Insurance лицензиясини 10 кунга тўхтатган эди. Шунингдек, компанияга 35 миллион сўм миқдорида жарима солинган.
Ўтган йили эса ушбу суғурта компанияси август ва апрел ойларида жами 72 миллион сўм жаримага тортилган. Курсив Uzbekistan томонидан 2023-йилда эълон қилинган суғуртачилар рейтингида Global Insurance «Умумий суғурта» тоифасида 27-ўринни эгаллаган.
Ўша пайтда компания активлари 57 миллиард сўмни ташкил этган. Global Insurance 2008-йилнинг апрел ойида ташкил этилган.
Жорий йилнинг 10-ноябр ҳолатига кўра, компаниянинг устав капитали 35 миллиард сўмни ташкил қилмоқда.
