Меркель Иванка Трамп отаси ўрнини эгаллашига муносабат билдирди

Германия канцлери Ангела Меркель АҚШ президенти Доналд Трампнинг қизи Иванка «Катта йигирматалик» саммити маросимларидан бири вақтида отаси ўрнини эгаллаганига муносабат билдирди.

«Иванка Трамп — АҚШ делегацияси аъзоси. У Оқ уйда ишлайди ва бир қатор ташаббусларга жавобгар ҳисобланади», — деган канцлер. У бундай ҳолат бошқа делегацияларда ҳам кузатилиши мумкинлиги, бу тартибларга зид эмаслигини қўшимча қилган.

8 июль куни Россиянинг G20’даги вакилларидан бири Светлана Лукаш ўз твиттерида Иванка Трамп саммит вақтида Африка, миграция ва соғлиқни сақлаш масалалари муҳокама қилинган учрашувда отаси ўрнини эгаллагани ҳақида ёзди. «Иванка Трампга ҳамроҳлик қилди ва у ўрнидан туриб кетганида, отасининг жойига ўтирди», — деб ёзганди Лукаш ўз твиттерида.

Иванка Трамп — президент Трампнинг чехословакиялик спортчи ва фотомодель Ивана Зельничкова билан никоҳидан туғилган тўнғич қизи ҳисобланади. Отаси давлат раҳбари лавозимига сайлангач, у жамоатчилик асосида унинг ёрдамчиси бўлиб ишламоқда. Бир қатор сиёсатчиларнинг фикрича, у отаси ва умуман, Оқ уй сиёсатига улкан таъсир ўтказиб келмоқда. Унинг турмуш ўртоғи Жаред Кушнер Трампнинг маслаҳатчиси лавозимида. Иванка ва Жаред президент маъмурияти аъзолари сифатида маош олишмайди.

Дональд Трампнинг ўзи ҳам бир неча бор қизи билан жуда фахрланишини айтиб ўтган. Кунларнинг бирида, агар Иванка унинг қизи бўлмаганида, қиз қайтага осонроқ ишлаган бўларди, деб ҳазиломуз оҳангда иқрор бўлган. “Замин” янгиликларини “Twitter”да кузатиб боринг