Вашингтонда "C5+1" саммитига бағишланган қабул маросимида АҚШ сенатори Жим Риш Марказий Осиё давлатлари ташқи ишлар вазирларига ўз ҳамкасби Стив Дейнс билан биргаликда Жексон-Веник тузатмасини бекор қилиш бўйича қонун лойиҳасини тақдим этганини маълум қилди.
Жексон-Веник тузатмаси 1974 йилда АҚШда қабул қилинган бўлиб, у эмиграция қилишни чеклаган давлатларга савдо имтиёзларини тақиқлашни назарда тутган.
Ушбу тузатма асосан собиқ Совет Иттифоқига қаратилган эди. Марказий Осиё давлатлари мустақилликка эришганига 30 йилдан ошган бўлишига қарамай, бу чекловлар ҳали ҳам савдо, инвестиция ва ҳамкорликка тўсқинлик қилмоқда.
Ришнинг таъкидлашича, чекловларни олиб ташлаш "иқтисодий ҳамкорликни кенгайтиришга йўл очади" ва Қўшма Штатлар билан Марказий Осиё ўртасида умумий стратегик манфаатларга асосланган шерикликни ривожлантиришга имконият беради. У минтақани "мураккаб қўшничилик"да, яъни кучайиб бораётган Хитой ва барқарорсизлашаётган Россия ўртасида жойлашганини эслатиб ўтди.
Сенаторнинг сўзларига кўра, АҚШ каби "тайёр шерик"нинг мавжудлиги Марказий Осиё давлатларига ўз келажагини мустақил белгилаб олишига ёрдам беради. "Дипломатик платформа "C5+1"нинг ўн йиллигида биз мамлакатларимиз ўртасида ҳамкорликнинг янги даврини бошлаётганимиз айни муддаодир," деди Риш.
Ушбу ташаббус нафақат АҚШнинг иқтисодий манфаатларига хизмат қилади, балки хорижда иқтисодий ўсишни қўллаб-қувватлаб, америка бизнеси учун янги бозорларни очади. Шунингдек, сенаторнинг фикрига кўра, чуқурроқ савдо алоқалари минтақавий барқарорликни мустаҳкамлайди ва Марказий Осиё давлатларига иқтисодий имкониятларни диверсификация қилишга ёрдам беради.
