18 декабрь куни Саудия Арабистонининг айрим ҳудудларида кутилмаган ва кам учрайдиган табиий ҳодиса — қор ёғиши кузатилди. Бу ҳақда Anadolu ахборот агентлиги хабар тарқатди.
Маълум қилинишича, қор мамлакатнинг асосан шимоли-ғарбий ҳамда марказий ҳудудларида ёғган. Маҳаллий ОАВ Ар-Риёд шаҳри ва унинг атрофидаги қор ёғишини “жуда кам учрайдиган воқеа” сифатида баҳолаган. Al Arabiya телеканали эса ушбу ҳолатни “тарихий ҳодиса” деб атаб, тахминан 30 йил давомида бундай об-ҳаво кузатилмаганини таъкидлаган.
Қор ёғишидан олдин синоптиклар мамлакат бўйлаб ҳаво ҳарорати кескин пасайиши мумкинлиги ҳақида огоҳлантирган эди. Шунингдек, айрим ҳудудларда дўл, кучли ёмғир ва момақалдироқ сабабли қизил ва тўқ сариқ даражадаги об-ҳаво хавфи эълон қилинган.
Нашрларда қайд этилишича, айни пайтда қатор араб давлатларида совуқ ҳаво оқимлари таъсирида кучли ёмғирлар ёғмоқда. Мутахассислар бу ҳолатни мавсумий эмас, балки ноодатий иқлим ўзгаришлари билан боғламоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
