Англия Лига кубогининг ярим финал босқичида «Манчестер Сити» ўз майдонида «Брентфорд»га қарши майдонга тушиб, 2:0 ҳисобида ишончли ғалабага эришди. Учрашув ўзбек футбол мухлислари учун яна бир муҳим жиҳати билан ёдда қолди — ҳамюртимиз Абдуқодир Ҳусанов баҳсни асосий таркибда бошлаб, 90 дақиқа давомида майдонда ҳаракат қилди.
Ўйиннинг илк дақиқалариданоқ «шаҳарликлар» устунликни қўлга олди. Ҳусанов ҳимоя чизиғида ишончли ҳаракат қилиб, рақибнинг хавфли ҳужумларини бир неча бор бартараф этди. Бироқ 16-дақиқада у жадал эпизодлардан бирида қоида бузгани учун ҳакам томонидан сариқ карточка билан огоҳлантирилди.
Шунга қарамай, ўзбекистонлик ҳимоячи ўйин давомида барқарор ўйинини сақлаб қолди ва жамоавий ҳаракатларда фаол иштирок этди. Учрашувдан кейин бир қатор нуфузли спорт порталлари Абдуқодир Ҳусановнинг ҳаракатларини юқори баҳолади.
Хусусан, FotMob нашри футболчимизга 7,8 балл қўйган бўлса, SofaScore портали унинг ўйинини 7,2 балл билан баҳолади. Flashscore сайти эса Ҳусановга 7,3 балл муносиб кўрди. Бу кўрсаткичлар ёш ҳимоячининг катта ўйинларда ўзини эркин тута олаётганидан далолат беради.
Шу тариқа, «Манчестер Сити» финал йўлида яна бир муҳим қадам ташлади. Абдуқодир Ҳусанов эса қисқа вақт ичида жамоа ишончини қозониб, ўз ўрнига эга бўлаётганини амалда исботламоқда.
Маълумот ўрнида, «шаҳарликлар» навбатдаги учрашувини 20 декабрь куни Англия Премьер-лигаси доирасида «Вест Хэм»га қарши ўтказади. Ушбу беллашув Тошкент вақти билан соат 20:00 да старт олиши режалаштирилган.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
