Солиқ кодексига тадбиркорларни қўллашга қаратилган қўшимчалар киритилмоқда

Сенаторлар томонидан “Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида”ги қонун кўриб чиқилди. Мазкур қонун билан Солиқ кодексига паррандачилик соҳасини ривожлантириш, болалар соғломлаштириш оромгоҳларининг фаолиятини янада қўллаб-қувватлашга ҳамда рақамли маркировкалаш тизимини такомиллаштиришга қаратилган ўзгартиришлар киритилмоқда.

Солиқ кодексига киритилаётган қўшимчаларга кўра, 2027 йил 1 январга қадар рақамли маркировкаланган маҳсулотлар чакана савдосини амалга оширувчи тадбиркорларга маркировкани ўқиш қурилмаларини сотиб олиш билан боғлиқ харажатлар суммасига, бироқ битта қурилма учун базавий ҳисоблаш миқдорининг 4 бараваридан кўп бўлмаган миқдорда, ҳисобланган ва тўланиши лозим бўлган фойда солиғи ёки айланмадан олинадиган солиқ ёхуд якка тартибдаги тадбиркорлар томонидан тўланадиган жисмоний шахслардан олинадиган даромад солиғи суммаларини камайтириш ҳуқуқи берилмоқда.

Паррандачилик соҳасидаги корхоналарни ҳамда болалар соғломлаштириш оромгоҳларини қўллаб-қувватлаш мақсадида қонунда 2030 йил 1 январга қадар паррандачилик маҳсулотлари ишлаб чиқарувчи тадбиркорлар экин майдонларидан ташқари ер участкалари бўйича юридик шахслардан олинадиган ер солиғини тўлашдан озод этилмоқда. Бунда, солиқ имтиёзи паррандачилик маҳсулотларини реализация қилаётган ҳамда белгиланган мақсадда бевосита фойдаланилмаётган ер участкаларига нисбатан татбиқ этилиши белгиланмоқда.

Қайд этилишича, республика бўйича жами 1 218 та паррандачилик корхонаси мавжуд бўлиб, экин майдонидан ташқари ер майдони 12,7 минг гектарни ташкил этади. Қишлоқ хўжалиги учун мўлжалланмаган ерлар бўйича ер солиғи ставкалари ер майдонининг жойлашган ҳудудига қараб 27 млн сўмдан 44 млн сўмгача белгиланган.

Бундан ташқари, қонунда 2027 йил 1 январга қадар бўлган даврда Ўзбекистон касаба уюшмалари Федерацияси тизимидаги стационар болалар соғломлаштириш оромгоҳлари бино-иншоотлари ва ер участкаларини ижарага беришдан олган даромадлари бўйича фойда солиғидан ҳамда ижарага берилган объектлар ва улар эгаллаган ер участкалари бўйича юридик шахсларнинг мол-мулкига солинадиган солиқдан ва юридик шахслардан олинадиган ер солиғидан озод этилиши ҳам назарда тутиляпти. Бунинг натижасида 51 та болалар соғломлаштириш оромгоҳи бўйича йиллик ўртача 17 млрд сўм солиқ имтиёзи тақдим этилади.

Қонун сенаторлар томонидан маъқулланди. «Замин»ни Telegram’да ўқинг!