Ўзбекистонда ҳароратнинг сезиларли пасайиши ва илк совуқлар ноябрь ойи бошида кузатилиши кутилмоқда, деб хабар берди Ўзгидромет.
Синоптикларнинг башоратига кўра, 29 октябрдан 5 ноябргача ҳарорат аста-секин пасаяди, баъзи ҳудудларда ёғингарчилик бўлиши мумкин. Баланд тоғли ҳудудларда эса ёмғир қорга айланиши эҳтимол қилинмоқда.
Қорақалпоғистон ва Хоразм вилоятларида тунги ҳарорат 3–8 даражагача, кейин -2 даражагача тушиши мумкин. Бухоро ва Навоийда ҳам шундай тенденция кузатилади — тунги ҳарорат 2–7 даражагача пасайиши кутилмоқда.
Тошкент, Самарқанд, Жиззах ва Сирдарё вилоятларида 2–5 ноябрь кунлари кечаси 3–8 даража, кундузги ҳарорат 13–18 даража атрофида бўлади.
Қашқадарё ва Сурхондарёда 29–30 октябрда 23–28 даража бўлган ҳаво 5 ноябрга келиб 15–20 даражага тушади. Фарғона водийси вилоятларида ҳам шунга ўхшаш пасайиш кутилмоқда.
Тоғли ва тоғолди ҳудудларда 29 октябрда қисқа муддатли ёмғир, баланд жойларда қор ёғиши мумкин. Кейинги кунларда ҳаво асосан қуруқ ва салқин бўлади.
Тошкентда 29 октябрда кундузги ҳарорат 22–24 даража бўлиб, ҳафта давомида 13–18 даражагача пасайиши башорат қилинмоқда.
Синоптиклар айтишича, бу йилги илк совуқлар одатдагидан бироз эртароқ келиши мумкин.
“Zamin”ни Telegram'да ўқинг!
