Goldman Sachs ва Morgan Stanley 2026-2027 йилларда фонд биржаларида 10-20% оралиғида пасайиш бўлишини кутмоқда. Бу ҳақда америкалик CNBC телеканали хабар берди.
Goldman Sachs бош директори Девид Соломонга кўра, бундай пасайишлар узоқ муддатли «буқачилик» бозорларининг одатий жиҳати ҳисобланади. У Гонконгдаги инвестиция саммитида сўзга чиқиб, «Инвестициялар аввал ўсади, кейин эса пасаяди, бу инвесторлар учун жараённи қайта кўриб чиқишга имконини беради», дея таъкидлади.
Morgan Stanley раҳбари Тед Пик ҳам шунга ўхшаш фикр билдирди. У инвесторларни бундай даврий пасайишларни салбий баҳоламасликка чақирди.
Унинг фикрига кўра, бундай тенденциялар соғлом бозор ривожланишини акс эттиради ва инқироз белгиси эмас. Ҳозирги кунда глобал акциялар сунъий интеллектга бўлган қизиқиш туфайли сезиларли ўсишни қайд этмоқда.
CNBC маълумотларига кўра, ўтган ой давомида Японияниг Nikkei 225 ва Жанубий Кореянинг Kospi индекслари рекорд даражага етди. Хитойнинг Shanghai Composite индекси эса сўнгги ўн йилликдаги энг юқори кўрсаткичга чиқди.
Goldman Sachs ва Morgan Stanley келгуси йилларда Осиё минтақаси ўсишнинг асосий йўналишларидан бири бўлишини тахмин қилмоқда. Goldman Sachsга кўра, инвесторлар дунёнинг энг йирик иқтисодиётларидан бири бўлган Хитойга қизиқишда давом этади.
Меҳмон гуруҳидаги фойдаланувчилар ушбу мақолага изоҳ қолдира олмайди.
