Ўзбекистоннинг Akfa компанияси АҚШнинг Кентукки штатида янги завод қурилишини бошлади. Инвестициялар умумий ҳажми $600 миллионни ташкил этади, деди Жаҳонгир Ортиқхўжаев «Ўзбекистон 24» телеканалига берган интервьюсида.
Режага кўра, завод алюминий маҳсулотлари, автомобиллар учун эҳтиёт қисмлар ҳамда қуёш панеллари учун деталлар ишлаб чиқаришга ихтисослашади. Ортиқхўжаевнинг таъкидлашича, лойиҳанинг биринчи босқичида $105 миллион миқдорида инвестиция киритилади.
Қурилиш жараёнига номаълум турк компанияси ҳам жалб қилинган. Ўтган ҳафта АҚШ Президенти Дональд Трамп Ўзбекистон 2028-йилгача АҚШдан маҳсулотлар харид қилиши ва иқтисодиётга $35 миллиард инвестиция киритиши, келгуси ўн йилда эса бу кўрсаткич $100 миллиарддан ошиб кетишини маълум қилган эди.
Шунингдек, Тошкент АҚШ компаниялари билан ноёб ер ресурслари соҳасида ҳам ҳамкорлик қилишни режалаштирган. Ўзбекистон АҚШнинг Boeing корпорациясидан 22 дона самолёт сотиб олиши, шунингдек, Америка қишлоқ хўжалиги ишлаб чиқарувчиларидан соя дўккаклари ва шрот харид қилиши кутилмоқда.
Бундан ташқари, Тошкент ва Вашингтон сунъий интеллект ҳамда сувни тежаш технологиялари соҳасида ҳамкорликни йўлга қўйишни режалаштирмоқда. Ўзбекистон Рақамли технологиялар вазирлиги Nvidia компаниясидан сунъий интеллект учун кластер ускуналарини харид қилишни режалаштирган.
