«Ўзбекнефтгаз» компаниясига суткалик газ қазиб олиш ҳажмини 66 млн куб метрдан 70 млн куб метргача етказиш, шунингдек, 2026 йил якунига қадар камида 25,4 млрд куб метр газ ишлаб чиқаришни таъминлаш топширилди.
Президент Шавкат Мирзиёев компаниянинг навбатдаги режалари ва олдидаги устувор вазифалар юзасидан йиғилиш ўтказди. Унда газ захираларини кўпайтириш учун геология-қидирув ишларини жадаллаштириш, янги инвестиция блокларини шакллантириш ҳамда аллақачон инвесторлар ихтиёрига берилган майдонларда ишларни тезлаштириш зарурлиги таъкидланди.
Йиғилишда нафтани қайта ишлаш масаласи ҳам алоҳида кўриб чиқилди. Ҳозирги қувватлар атиги 70% банд, маҳсулот эса четга имкониятдагидан икки баробар арзон нархда сотилаётгани қайд этилди. Нафтани полимер маҳсулотларига айлантириш қўшилган қийматни олти баробар ошириши инобатга олиниб, мавжуд қувватларни тўлиқ ишга солиш вазифаси қўйилди.
Шунингдек, «Ўзбекнефтгаз» тузилмасида коррупцияга қарши йўналиш бўйича раис ўринбосари лавозими жорий этилди, комплаенс ҳамда ички назорат хизмати ташкил қилинди.
“Zamin”ни Telegram'да ўқинг!
