Ижтимоий тармоқларда Маданият вазири Озодбек Назарбеков тўй маросимида қўшиқ куйлаб, унга узатилган пулларни қабул қилаётгани акс этган видео кенг муҳокамаларга сабаб бўлди. Мазкур ҳолат юзасидан Маданият вазирлиги расмий изоҳ берди.
Видео 2025 йил 25 октябрь куни вазирлик ходимларидан бирининг никоҳ тўйида тасвирга олинган. Унда вазирга мухлислар томонидан пул узатилгани акс этган.
Расмий изоҳда таъкидланишича, ушбу ҳолат олдиндан режалаштирилмаган. Вазирга узатилган пулларни қабул қилмаслик тўй иштирокчилари томонидан камситиш ёки менсимаслик сифатида қабул қилиниши мумкинлиги инобатга олинган. Шу боис, юзага келган вазиятга ижобий муносабат билдирилган.
Вазирликка кўра, тўй маросимларида хонандаларга пул қистириш амалдаги қонунчилик билан тақиқланмаган. Бу эса халқимиз орасида асрлар давомида шаклланган миллий урф-одат ва қадриятларнинг бир қисми ҳисобланади. Ўзбек анъаналарида бу ҳолат “орзу-ҳавас” сифатида қабул қилинади.
Шунингдек, расмийлар Озодбек Назарбеков нафақат вазир, балки таниқли хонанда эканини эслатган. У Ўзбекистон, Қорақалпоғистон, Тожикистон ва Қирғизистон халқ артисти, шунингдек хизмат кўрсатган маданият ходими ҳисобланади. Тўйда кузатилган ҳолат ҳам айнан унинг касбий фаолияти билан боғлиқ ҳолда баҳоланиши лозимлиги таъкидланган.
«Ҳар қандай инсон, эгаллаб турган лавозимидан қатъи назар, ўз танлаган касбидан айро бўла олмайди. Бу ҳолат ҳам шу нуқтайи назардан келиб чиққан», дейилади вазирлик баёнотида.
Шу билан бирга, Kun.uz’нинг хабар беришича, Коррупцияга қарши курашиш агентлиги мазкур ҳолат юзасидан Маданият вазирлигига тақдимнома киритган.
Эслатиб ўтамиз, бу Озодбек Назарбеков билан боғлиқ илк муҳокамали ҳолат эмас. 2024 йилда у Kingsman кийим дўкони рекламасида иштирок этган, 2025 йилда эса хусусий университет реклама ролигида кўринган эди. Ўшанда ҳам вазирлик бу ҳаракатларда моддий манфаатдорлик бўлмаганини маълум қилган.
“Zamin”ни Telegram'да ўқинг!
