АҚШ Бағалы қағаздар және биржалар комиссиясының (SEC) комиссары, криптографиялық ортада «Крипто ана» деген атпен танымал Хестер Пирс өз қызметінен кетіп, Риджент университетінің заң факультетіне доцент ретінде жұмысқа орналасады. Университет хабарламасына сәйкес, ол қараша айынан бастап педагогикалық қызметін бастайды. Бұл туралы Cointelegraph.com хабарлайды .
Пирстің SEC-тегі өкілеттік мерзімі ресми түрде 2025 жылдың маусымында аяқталғанымен, ережелерге сәйкес, комиссарлар жаңа үміткер тағайындалғанға дейін 18 айға дейін өз міндеттерін атқара алады. Ол агенттікке 2018 жылы Дональд Трамп әкімшілігі кезінде келген және 2020 жылы екінші мерзімге қайта бекітілген болатын.
Хестер Пирс заң мектебінде федералдық сот процестері, бағалы қағаздарды реттеу және цифрлық активтер сияқты бағыттарда академиялық базаны нығайтуға көмектеседі деп күтілуде. Оның кетуімен SEC құрамында тек екі республикашыл комиссар — Марк Уеда мен төраға Пол Аткинс қалады.
Дональд Трамп 2025 жылдың қаңтарында президенттік қызметіне кіріскеннен бері SEC крипто индустриясын реттеудегі өз көзқарасын түбегейлі өзгертті. Агенттік бірқатар крипто компанияларға қатысты тергеу және жазалау шараларын тоқтатты. Қазіргі уақытта SEC пен CFTC арасындағы «реттеушілер соғысын» тоқтату және саланы үйлестірілген түрде басқару шаралары қолға алынуда.
АҚШ Конгресінде қаралып жатқан CLARITY Act заң жобасы крипто нарықтарын бақылау өкілеттіктерінің үлкен бөлігін SEC-тен CFTC-ге көшіруді көздейді. Сонымен бірге, екі агенттікте де комиссарлардың жетіспеушілігі байқалуда, өйткені көптеген орындар әлі де бос тұр.
“Zamin”-ді Telegram-нан оқыңыз!
