2025 йил 17 декабрь куни Universal Pictures кинокомпанияси томонидан афсонавий режиссёр Стивен Спилбергнинг навбатдаги йирик лойиҳаси учун илк тизер намойиш этилди. Маълум бўлишича, фильм Disclosure Day деб номланади ва у инсоният ҳаётини тубдан ўзгартирадиган воқеа — бошқа сайёраликлар мавжудлиги ошкор бўлиши атрофида қурилган.
Тизер роликда глобал миқёсдаги ҳаяжон, хавотир ва кутилмаган ҳақиқат билан юзма-юз келган жамият кайфияти акс эттирилган. Аммо фильм сюжетига оид батафсил тафсилотлар ҳозирча махфий сақланмоқда. Шу орқали ижодий жамоа томошабинларда қизиқиш ва интригани янада кучайтиришга ҳаракат қилмоқда.
Асосий роллар Голливуднинг таниқли юлдузлари — Эми Блант ва Жош О’Коннорга ишониб топширилган. Улар билан бирга фильмда Колин Ферт, Ив Хьюсон, Колман Доминго, Уайатт Рассел ҳамда Генри Ллойд-Хьюз каби нуфузли актёрлар ҳам иштирок этган.
Disclosure Day Стивен Спилберг фаолиятидаги 37-тўлиқ метражли картина ҳисобланади. Режиссёр сценарий устида “Юрассик Парк” франшизаси орқали машҳур бўлган сценарист Девид Кепп билан ҳамкорлик қилган. Бу эса фильмдан янада катта масштаб, кучли драматургия ва таъсирчан визуал ечимлар кутишга асос беради.
Фильмнинг халқаро премьераси 2026 йил 12 июнь кунига белгиланган. Мутахассислар фикрича, Disclosure Day нафақат илмий-фантастик жанр мухлислари, балки кенг томошабинлар аудиторияси учун ҳам йилнинг энг катта кино воқеаларидан бирига айланиши мумкин.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
