2025 yil 17 dekabr kuni Universal Pictures kinokompaniyasi tomonidan afsonaviy rejissyor Stiven Spilbergning navbatdagi yirik loyihasi uchun ilk tizer namoyish etildi. Ma’lum bo‘lishicha, film Disclosure Day deb nomlanadi va u insoniyat hayotini tubdan o‘zgartiradigan voqea — boshqa sayyoraliklar mavjudligi oshkor bo‘lishi atrofida qurilgan.
Tizer rolikda global miqyosdagi hayajon, xavotir va kutilmagan haqiqat bilan yuzma-yuz kelgan jamiyat kayfiyati aks ettirilgan. Ammo film syujetiga oid batafsil tafsilotlar hozircha maxfiy saqlanmoqda. Shu orqali ijodiy jamoa tomoshabinlarda qiziqish va intrigani yanada kuchaytirishga harakat qilmoqda.
Asosiy rollar Gollivudning taniqli yulduzlari — Emi Blant va Josh O’Konnorga ishonib topshirilgan. Ular bilan birga filmda Kolin Fert, Iv Xyuson, Kolman Domingo, Uayatt Rassel hamda Genri Lloyd-Xyuz kabi nufuzli aktyorlar ham ishtirok etgan.
Disclosure Day Stiven Spilberg faoliyatidagi 37-to‘liq metrajli kartina hisoblanadi. Rejissyor ssenariy ustida “Yurassik Park” franshizasi orqali mashhur bo‘lgan ssenarist Devid Kepp bilan hamkorlik qilgan. Bu esa filmdan yanada katta masshtab, kuchli dramaturgiya va ta’sirchan vizual yechimlar kutishga asos beradi.
Filmning xalqaro premerasi 2026 yil 12 iyun kuniga belgilangan. Mutaxassislar fikricha, Disclosure Day nafaqat ilmiy-fantastik janr muxlislari, balki keng tomoshabinlar auditoriyasi uchun ham yilning eng katta kino voqealaridan biriga aylanishi mumkin.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
