Барселонадаги Camp Nou стадионини реконструкция қилаётган ишчилар яшаш ва меҳнат шароитларидан шикоят қилишди. Испаниянинг El Dia нашри хабар беришича, турли субпудрат компаниялари ходимлари жуда оғир шароитларда ишламоқда.
Маълумотларга кўра, беш нафар ишчи Л’Хоспиталет-де-Льобрегатдаги 60 квадрат метрлик хонадонда яшаган. Уларга атиги икки хона ва битта ҳожатхона берилган, бу ҳожатхонадан барча бирга фойдаланган.
Ишчиларни ҳафтасига олти кун, баъзан эса якшанба куни ҳам 10-12 соат ишлашга мажбур қилишган. Улардан айримлари Испаниянинг ижтимоий суғурта тизимида рўйхатдан ўтмаган ва турк ёки литва компаниялари ходимлари сифатида кўрсатилган.
Ишчиларнинг яшаш учун рухсатномалари муддати ўтиб кетгани сабабли улар уйларига қайта олмаган. Энг тажрибали ишчи Иззет шароитларни бошқа жойлардаги қурилишлар билан солиштириб, қуйидаги фикрни билдирган: "Мен Туркияда атом электр станциялари, Ўзбекистонда бинолар ва йўллар, Германия ва Польшада қурилишларда ишлаганман — лекин ҳеч қачон бундай муносабатни кўрмаганман." Каталония ҳукумати иш шароитларини ўрганишни бошлаган ва ҳужжатсиз ишлаш ҳолатлари аниқланган.
CCOO касаба уюшмаси маълумотларига кўра, ишчиларнинг ҳуқуқларини ҳимоя қилишга уринаётган қатор ходимлар ишдан бўшатилган. Субпудратчи компания Extreme Works 50 дан ортиқ ишчини ишдан четлатган.
Camp Nou объект бўйича субпудратчилар меҳнат қонунчилигини 218 марта бузганликда айбланиб, 2 миллион евро жаримага тортилган. Эслатиб ўтамиз, Camp Nou стадиони "Барселона" футбол клуби учун асосий стадион ҳисобланади.
Меҳмон гуруҳидаги фойдаланувчилар ушбу мақолага изоҳ қолдира олмайди.
