Криштиану Роналду келажагини гўё бўлаклаб сотаётгандек: ҳар мавсум янги гап-сўз, лекин “якун” деган сўзга ҳеч ким ишонмайди. Журналист Бен Жейкобс келтирган маълумотларга кўра, афсонавий португалиялик 2027 йилда “Ан-Наср”ни тарк этиши мумкин. Бу ҳақда euro-football.ru хабар беради.
Ҳақиқат шуки, Роналду ҳозир 40 ёшда.
Фаолияти давомида у 960 та гол урди ва мингталик маррага етиш истаги ҳануз кучли. Саудиядаги шартномаси 2027 йилгача, “Ан-Наср” сафида эса 125 ўйинда 110 гол қайд этган.
Буларнинг бари “энди кетаман” деяётган футболчининг статистикаси эмас. Роналду оиласи тўхташни маслаҳат беришини яширмайди, ўзи эса ҳали ҳам клубга ҳам, терма жамоага ҳам фойдам тегмоқда, дея фикр билдиради. У танасига бўлган муносабатни тизимга айлантирган: мушаклар — капитал, рекордлар эса — валюта.
Унинг A Bola нашрига айтган гапи ҳам шуни тасдиқлайди:
“Ўйлайманки, мен ҳали ҳам яхшиман, клубимга ва терма жамоага ёрдам беряпман, нега давом эттирмаслигим керак?”
Шу билан бирга, Роналдуга футбол ташқарисидаги йўл ҳам эҳтиёткорлик билан кўрсатилмоқда. “Манчестер Юнайтед”, “Ньюкасл”, “Вильярреал” ва “Фиорентина”нинг собиқ ҳужумчиси Жузеппе Росси Goal.com'га берган интервьюсида уни Голливудга чорлаб, ҳатто Жокер ролини ҳам тилга олди. Франция терма жамоаси, “Арсенал” ва “Барселона”нинг собиқ ярим ҳимоячиси Эммануэль Пети эса Hochgepokert'dа бу ғояни янада “баландроқ” олиб чиқиб, “Оскар” ҳақида ҳам гапирди.
Бу тасодиф эмас: Роналду аллақачон оддий футболчи эмас, тўлақонли брендга айланган. Унга “Ан-Наср”дан “Бенфика”га қайтишдан кўра, Warner Bros павильонига кириб бориш ҳам мантиқийроқ кўринади. Камера уни зарба каби яхши кўради, шунинг учун “янги Жокер” ғояси ҳам кастинг учун ёмон вариант эмас. Ахир “Сиу” олдидан шунчалик пауза билан томошабинни бошқара оладиган яна ким бор?
Асосий тўқнашув кинода эмас ва “Ан-Наср” уни ушлаб қолиш учун клуб улушини 15 фоизгача ошириши мумкин, деган гапларда ҳам эмас. Гап шундаки, Роналду илк бор футболдан кейин ҳам ўзига бўлган қизиқишни қандай сақлаб қолиш масаласи билан юзлашмоқда. Атрофидагилар эса эътибор пасайиб кетмаслиги устида аллақачон бош қотираётгани аниқ.
Яна бир детал: шу кунларда Мадейрада Криштианунинг ҳайкали ёқиб юборилди, полиция вандални қўлга олди. Роналду эса навбатдаги голидан кейин “Ишонишда давом этамиз, курашишда давом этамиз” мазмунида ёзув қолдирди. Манзара икки фильмнинг параллел монтажига ўхшайди: бирида қаҳрамон 960-голини уради, иккинчисида эса унинг бронза тимсолини кулга айлантиришга уринишади. Иккала сюжет ҳам бир нарсани айтади: кўламни кўтара олмаслик ва абадийликдан чўчиш.
Роналду кетиши нимани англатади? Агар бу жимжит “раҳмат” бўлса, бу португалияликка умуман ўхшамайди. Аксинча, стадионлар бўйлаб хайрлашув тури, фильм, реклама ва минг гол сари яна бир юриш — анча мантиқий кўринади. Чунки у доим майдонда гўё трибунада мухлислар эмас, ҳакамлар ҳайъати ўтиргандек ўйнаган.
Энг баҳсли хулоса ҳам шу: Роналду карьерасини тугатишдан эмас, янгилик манбаи бўлишдан тўхтаб қолишдан чўчийди. У эса инфо-сабабни ҳамма нарсадан чиқаради — Пирс Морган билан шов-шувли суҳбатдан тортиб, “Бетмен”даги эҳтимолий Жокер ролига қадар.
Роналду “қолган кам йилларимдан завқланмоқчиман” дея такрорлайди, дунё эса бу “кам йиллар” аслида нечта эканини баҳс қилади. Португалиялик эса одатдагидек давом этади: ҳар қадамини воқеага, ҳар голини далилга, ҳар бир “тез орада”ни эса чексизликка айлантиради. Чунки унинг оламида хайрлашув ҳам рекорд бўлиши керак.
Арман Тигранян
“Zamin”ни Telegram'да ўқинг!
