Krishtianu Ronaldu kelajagini go'yo bo'laklab sotayotgandek: har mavsum yangi gap-so'z, lekin “yakun” degan so'zga hech kim ishonmaydi. Jurnalist Ben Jeykobs keltirgan ma'lumotlarga ko'ra, afsonaviy portugaliyalik 2027 yilda “An-Nasr”ni tark etishi mumkin. Bu haqda euro-football.ru xabar beradi.
Haqiqat shuki, Ronaldu hozir 40 yoshda.
Faoliyati davomida u 960 ta gol urdi va mingtalik marraga yetish istagi hanuz kuchli. Saudiyadagi shartnomasi 2027 yilgacha, “An-Nasr” safida esa 125 o'yinda 110 gol qayd etgan.
Bularning bari “endi ketaman” deyayotgan futbolchining statistikasi emas. Ronaldu oilasi to'xtashni maslahat berishini yashirmaydi, o'zi esa hali ham klubga ham, terma jamoaga ham foydam tegmoqda, deya fikr bildiradi. U tanasiga bo'lgan munosabatni tizimga aylantirgan: mushaklar — kapital, rekordlar esa — valyuta.
Uning A Bola nashriga aytgan gapi ham shuni tasdiqlaydi:
“O'ylaymanki, men hali ham yaxshiman, klubimga va terma jamoaga yordam beryapman, nega davom ettirmasligim kerak?”
Shu bilan birga, Ronalduga futbol tashqarisidagi yo'l ham ehtiyotkorlik bilan ko'rsatilmoqda. “Manchester Yunayted”, “Nyukasl”, “Vilyarreal” va “Fiorentina”ning sobiq hujumchisi Juzeppe Rossi Goal.com'ga bergan intervyusida uni Gollivudga chorlab, hatto Joker rolini ham tilga oldi. Fransiya terma jamoasi, “Arsenal” va “Barselona”ning sobiq yarim himoyachisi Emmanuel Peti esa Hochgepokert'da bu g'oyani yanada “balandroq” olib chiqib, “Oskar” haqida ham gapirdi.
Bu tasodif emas: Ronaldu allaqachon oddiy futbolchi emas, to'laqonli brendga aylangan. Unga “An-Nasr”dan “Benfika”ga qaytishdan ko'ra, Warner Bros pavilyoniga kirib borish ham mantiqiyroq ko'rinadi. Kamera uni zarba kabi yaxshi ko'radi, shuning uchun “yangi Joker” g'oyasi ham kasting uchun yomon variant emas. Axir “Siu” oldidan shunchalik pauza bilan tomoshabinni boshqara oladigan yana kim bor?
Asosiy to'qnashuv kinoda emas va “An-Nasr” uni ushlab qolish uchun klub ulushini 15 foizgacha oshirishi mumkin, degan gaplarda ham emas. Gap shundaki, Ronaldu ilk bor futboldan keyin ham o'ziga bo'lgan qiziqishni qanday saqlab qolish masalasi bilan yuzlashmoqda. Atrofidagilar esa e'tibor pasayib ketmasligi ustida allaqachon bosh qotirayotgani aniq.
Yana bir detal: shu kunlarda Madeyrada Krishtianuning haykali yoqib yuborildi, politsiya vandalni qo'lga oldi. Ronaldu esa navbatdagi golidan keyin “Ishonishda davom etamiz, kurashishda davom etamiz” mazmunida yozuv qoldirdi. Manzara ikki filmning parallel montajiga o'xshaydi: birida qahramon 960-golini uradi, ikkinchisida esa uning bronza timsolini kulga aylantirishga urinishadi. Ikkala syujet ham bir narsani aytadi: ko'lamni ko'tara olmaslik va abadiylikdan cho'chish.
Ronaldu ketishi nimani anglatadi? Agar bu jimjit “rahmat” bo'lsa, bu portugaliyalikka umuman o'xshamaydi. Aksincha, stadionlar bo'ylab xayrlashuv turi, film, reklama va ming gol sari yana bir yurish — ancha mantiqli ko'rinadi. Chunki u doim maydonda go'yo tribunada muxlislar emas, hakamlar hay'ati o'tirgandek o'ynagan.
Eng bahsli xulosa ham shu: Ronaldu karyerasini tugatishdan emas, yangilik manbai bo'lishdan to'xtab qolishdan cho'chiydi. U esa info-sababni hamma narsadan chiqaradi — Pirs Morgan bilan shov-shuvli suhbatdan tortib, “Betmen”dagi ehtimoliy Joker roliga qadar.
Ronaldu “qolgan kam yillarimdan zavqlanmoqchiman” deya takrorlaydi, dunyo esa bu “kam yillar” aslida nechta ekanini bahs qiladi. Portugaliyalik esa odatdagidek davom etadi: har qadamini voqeaga, har golini dalilga, har bir “tez orada”ni esa cheksizlikka aylantiradi. Chunki uning olamida xayrlashuv ham rekord bo'lishi kerak.
Arman Tigranyan
“Zamin”ni Telegramʻda oʻqing!
