Футбол эксперти Александр Точилин «Евро-Футбол.Ru»га берган эксклюзив интервьюсида FIFA президенти Жанни Инфантино Россия жамоаларига қўйилган таъқиқни олиб ташлаш ғоясини қўллаб-қувватлагани ҳамда ОАВда тилга олинаётган, ХОК Россия спортига қўлланган барча санкцияларни яқин орада бекор қилиши мумкинлиги ҳақидаги хабарларга муносабат билдирди. Бу ҳақда euro-football.ru хабар беради.
Точилиннинг айтишича, бундай қарорга ишонишни истайди, чунки бу мавзудаги гап-сўзлар анчадан бери юрибди. У Европада Россияни изоляциядан чиқариш учун принципиал ёндашув кераклигини, шунингдек Россиясиз йирик мусобақаларнинг интрига ва оммабоплиги пасайишини ҳам тушунишларини таъкидлади.
Инфантинолинг Россияни четлатиш «маъносиз» экани ҳақидаги фикрларига тўхталган Точилин буни дунёдаги умумий кайфият ўзгараётгани билан изоҳлади. Унинг фикрича, Россияга нисбатан икки хил стандарт ва бирёқлама муносабат кўриниб турибди, бироқ вақт ўтиши билан ўзгаришлар бўлмоқда ва таъқиқнинг ўзи ҳам тобора «абсурд» кўриниш олмоқда.
Эксперт ХОК санкцияларни бекор қилса, бу футболга ҳам бевосита таъсир қилиб, FIFA ва UEFA қарорларини қайта кўриб чиқишига туртки бўлиши мумкинлигини айтди. Точилиннинг таъкидлашича, бундай вазиятда «занжирли реакция» юз беради: ким биринчи бўлиб қадам ташласа, бошқалар ҳам ўша йўлдан боради.
Инфантино келажакда сиёсий сабаблар туфайли жамоаларни мусобақалардан четлатишни қонунан тақиқлаш кераклигини билдирган эди. Точилин бу ғояни қўллаб-қувватлаб, спортнинг бош шиори сиёсатдан холи бўлиши кераклиги, Россияга нисбатан қабул қилинган қарорлар эса айнан шу тамойилга зид келаётганини қайд этди.
ОАВда FIFA апрел ойидаги конгрессда Россиянинг халқаро турнирларга тўлиқ қайтиши масаласини муҳокама қилиши мумкинлиги ҳақида ҳам ёзилмоқда. Точилин бундай эҳтимолни инкор этмади ва бу каби маълумотлар бекорга тарқамаётганини, энди ижобий сценарий ҳақида ўйлаш мумкинлигини билдирди.
Шунингдек, у Россия қайтган тақдирда ҳам айрим рақиблар майдонга тушишдан бош тортиши мумкинлиги ҳақидаги саволга жавоб берди. Точилиннинг фикрича, ҳар бир ташкилотнинг ўз регламенти бор ва уни ким бузса, сабабидан қатъи назар интизомий чоралар қўлланиши шарт; техник мағлубиятлар бундай демаршларнинг олдини олиб, бошқаларга ҳам сигнал бўлади.
“Zamin”ни Telegram'да ўқинг!
