Россиянинг «Бирлашган двигателсозлик корпорацияси» (Ростех таркибига киради) СЖ-100 самолётлари учун мўлжалланган ПД-8 авиадвигателининг сертификация синовлари якунланганини эълон қилди. Эндиликда двигателни СЖ-100 самолётларида тўлиқ эксплуатация қилиш учун зарур бўлган тур сертификатини олиш босқичи бошланади. Бу ҳақда Ixbt.com хабар беради.
Синовлар давомида ПД-8 двигатели 6500 соатдан ортиқ ишлади. Текширувлар ҳам стендларда, ҳам бевосита СЖ-100 самолёти таркибида ўтказилди. Двигател Архангелск вилоятидаги экстремал об-ҳаво шароитларида, хусусан, музлаш ҳолатларида ҳам синаб кўрилди.
Двигател қушлар, сув ва дўл билан тўқнашувлар, шунингдек, вентилятор паррагининг шикастланиши каби оғир синовлардан муваффақиятли ўтди. Бундан ташқари, 150 соатлик ресурс синовлари ўтказилиб, двигателнинг чидамлилиги текширилди.
ПД-8 ни ишлаб чиқишда 25 та муҳим технология қўлланилган бўлиб, улардан 17 таси саноат учун мутлақо янги ҳисобланади. «ОДК-Сатурн» мутахассислари экстремал юкламалардан сўнг двигателни қисмларга ажратиб, ҳар бир деталнинг ҳолатини таҳлил қилишди ва олинган натижалар сертификация учун асос бўлиб хизмат қилди.
“Zamin”ни Telegram'да ўқинг!
