Ўзбекистон миллий терма жамоаси ҳамда Англиянинг “Манчестер Сити” клуби ҳимоячиси Абдуқодир Ҳусанов яна халқаро оммавий ахборот воситалари диққат марказига тушди. Қозоғистоннинг спортга ихтисослашган йирик нашрларидан бири — sportarena.kz сайти ўзбек футболчисининг трансфер қиймати ҳақида алоҳида мақола эълон қилди.
Нашрда таъкидланишича, Абдуқодир Ҳусановнинг бугунги бозор баҳоси Қозоғистон миллий терма жамоасининг умумий трансфер қийматидан деярли икки баробар юқори ҳисобланади.
Transfermarkt портали маълумотларига кўра, ҳозирги вақтда ўзбек ҳимоячисининг трансфер нархи 35 миллион еврога етган. Бу эса нафақат Ўзбекистон футболи, балки бутун Осиё футболи учун ҳам катта ютуқ сифатида баҳоланмоқда.
Қозоғистонлик журналистлар Ҳусановнинг қисқа вақт ичидаги ўсишини “ҳайратланарли сакраш” деб атади. Чунки у Франциянинг “Ланс” клубига йўл олган пайтда 12 миллион евро атрофида баҳоланган эди. Кейинчалик Англиянинг гранд клуби — “Манчестер Сити” сафига қўшилганидан кейин унинг қиймати янада кескин ўсди.
Қайд этилишича, икки йилга ҳам етмаган вақт оралиғида футболчининг баҳоси 23 миллион еврога қимматлашди. Бу эса унинг Европадаги барқарор ўсиши, юқори даражадаги ўйинлари ва жаҳон футболидаги нуфузи ошиб бораётганидан дарак беради.
Таққослаш учун, ҳозирда Қозоғистон миллий терма жамоасининг умумий бозор қиймати 17,7 миллион евро деб баҳоланмоқда. Демак, Абдуқодир Ҳусановнинг бир ўзи қўшни давлат термасининг умумий таркибидан анча қиммат туради.
Шу билан бирга, Қозоғистоннинг энг қиммат футболчиси сифатида “Қайрат” клубида тўп сураётган ва “Челси” билан шартнома имзолаган 17 ёшли Дастан Сатпаев тилга олинган. Унинг трансфер қиймати ҳозирча 3 миллион евро атрофида баҳоланмоқда.
Жорий мавсумда Абдуқодир Ҳусанов “Манчестер Сити”нинг асосий таркибида мустаҳкам ўрин эгаллади. У барча мусобақаларда 29 та учрашувда иштирок этиб, кўплаб баҳсларда старт таркибида майдонга тушди.
Мухлислар ва мутахассислар унинг ҳимоядаги ишончли ҳаракатлари, вазиятни тез ўқий олиши, техник маҳорати ҳамда ҳужумларни орқадан бошлаб бериш қобилиятини алоҳида эътироф этмоқда. Айни жиҳатлар Пеп Гвардиола учун Ҳусановни жуда қимматли футболчига айлантиргани таъкидланди.
Шунингдек, ўзбек ҳимоячиси миллий терма жамоада ҳам етакчилардан бири сифатида кўрилмоқда. У сўнгги учрашувларда мунтазам равишда асосий таркибда майдонга тушиб, ҳимоя чизиғининг муҳим фигурасига айланиб улгурди.
Қисқа қилиб айтганда, Абдуқодир Ҳусанов бугун нафақат Ўзбекистон, балки бутун Марказий Осиё футболидаги энг ёрқин юлдузлардан бири сифатида эътироф этилмоқда.
“Zamin”ни Telegram'да ўқинг!
