Мадриднинг “Реал” клубида яна шов-шувли воқеалар муҳокама марказига чиқди. Бу сафар асосий эътибор жамоа етакчиларидан бири — Федерико Вальверде атрофидаги можароларга қаратилмоқда.
Испаниялик журналист Рауль Варела уругвайлик ярим ҳимоячи иштирокидаги яна бир кескин ҳолат ҳақида маълумот берди. Аввалроқ ОАВда Вальверде машғулот жараёнида жамоадоши Орельен Тчуамени билан жанжаллашиб кетгани, ҳатто вазият муштлашувгача етгани ҳақида хабарлар тарқалган эди.
Айрим манбаларга кўра, икки футболчи ўртасидаги таранглик машғулот давомидаёқ бошланган ва кейинчалик вазият жиддий тус олган. Ҳатто Тчуамени шифохонага олиб кетилгани ҳақида ҳам маълумотлар пайдо бўлди.
“La Tribu” дастури бошловчиси ва директори Рауль Варела эса бу каби ҳолат биринчи марта кузатилаётгани йўқлигини таъкидлади.
Унинг сўзларига кўра, ўтган йил апрель ойида “Алавес”га қарши учрашувдан кейин ҳам Вальверде кийиниш хонасида жамоадошларидан бири билан қаттиқ тортишиб қолган.
Ўша баҳсда “қаймоқранглилар” 2:1 ҳисобида ғалаба қозонган бўлса-да, жамоа ичидаги муҳит анча таранг бўлгани айтилмоқда.
Варела Вальверденинг охирги пайтлардаги хатти-ҳаракатлари “Реал” каби катта клуб сардорига мос келмаётганини очиқчасига айтди.
Журналистнинг таъкидлашича, уругвайлик футболчи янги бош мураббий Хаби Алонсога ўзини қанот ҳимоясида ўйнашни истамаётганини билдирган.
Бу эса клуб ичида айрим норозиликларга сабаб бўлгани айтилмоқда.
Рауль Варела бу ҳақда шундай деди:
“Вальверде билан нима бўлаётганини тушуниш қийин. Буни ортиқча катта муаммога айлантирмоқчи эмасман, аммо фактлар бор. “Алавес”га қарши ўйиндан кейин у бир жамоадошининг ҳаракатларини қаттиқ танқид қилди, кейин бошқа футболчини ҳам огоҳлантирди. Энди эса Тчуамени билан жанжаллашди. Сен “Реал” сардорисан. Агар ўзингни назорат қила олмасанг, қандай лидер бўласан?”
Мухлислар орасида эса бу хабарлар турлича қабул қилинмоқда. Айримлар Вальверденинг жамоага бўлган талабчанлиги ва ғалабага чанқоқлигини қўллаб-қувватлаётган бўлса, бошқалар унинг асабийлашиб бораётганини хавотир билан кузатмоқда.
Шу билан бирга, “Реал” раҳбарияти ҳозирча бу воқеалар юзасидан расмий баёнот бермаган. Аммо жамоадаги ички муҳит ва етакчилар орасидаги муносабатлар яқин ҳафталарда яна катта муҳокамага айланиши мумкин.
“Zamin”ни Telegram'да ўқинг!
