Россия Миллий тадқиқот ядро университети (МИФИ) олимлари замонавий астрофизиканинг долзарб муаммоларини ҳал қилишга қаратилган янги гамма-телескоп прототипини ишлаб чиқди. Мазкур қурилма юқори энергияли гамма-нурланишни ўрганиш, шунингдек, қоронғу материя ва сирли гамма-чақнашлар сигналларини аниқлаш учун мўлжалланган. Бу ҳақда Ixbt.com хабар беради.
Янги ишланманинг асосий афзаллиги — гамма-квантларни зарядланган космик зарралардан ажратиб олиш қобилиятининг юқорилигидир. МИФИ вакилларининг таъкидлашича, ушбу кўрсаткич бўйича қурилма Американинг машҳур Ферми гамма-телескопидан ҳам устунлик қилади. Бу эса космик кузатувлар аниқлигини сезиларли даражада оширади.
Гамма-астрономия соҳасида нурланишни тўғридан-тўғри фокуслаш имконсиз бўлгани сабабли, олимлар уни билвосита усуллар билан қайд этишади. Янги тизимда гамма-квант конвертер-трекерга тушиб, электрон-позитрон жуфтлигини ҳосил қилади, уларнинг ҳаракати эса махсус детекторлар орқали кузатилади. Тизимга ўрнатилган вақтга сезгир ҳимоя механизми шовқинларни йўқотиб, фойдали сигнални аниқ ажратиб олиш имконини беради.
Прототип аллақачон Троитскдаги «Пахра» тезлатгич мажмуасида муваффақиятли синовдан ўтди ва ўз самарадорлигини тасдиқлади. Келгусида ушбу телескопни космик аппаратга ўрнатиш режалаштирилган. Унинг асосий вазифаси пульсарлар, қуёш чақнашлари ва коинотдаги энг мураккаб ҳодисаларни тадқиқ қилишдан иборат бўлади.
“Zamin”ни Telegram'да ўқинг!
