Ўзбекистонда табиий газ қазиб олишда сезиларли тушиш қайд этилди

2026 йилнинг биринчи чорагида Ўзбекистонда нефть, табиий газ ва кўмир қазиб олиш ҳажмида пасайиш кузатилди. Бу ҳақда Миллий статистика қўмитаси маълумот берди.

Қайд этилишича, январ–март ойларида табиий газ қазиб олиш ҳажми 9,6 миллиард куб метрни ташкил этган. Бу кўрсаткич ўтган йилнинг шу даврига нисбатан 15 фоизга камайган.

Нефть ишлаб чиқариш ҳажми 157,3 минг тоннага етган бўлиб, 2,2 фоизлик пасайиш қайд этилган. Газ конденсати ишлаб чиқариш ҳам 18,3 фоизга қисқариб, 242,3 минг тоннани ташкил қилган. 2024 йил билан таққосланганда ҳам пасайиш юқори даражада экани айтилмоқда.

Шу билан бирга, айрим йўналишларда ижобий ўсишлар кузатилган. Автомобиль бензини ишлаб чиқариш 2,9 фоизга ошиб, 313,2 минг тоннага етган. Ёқилғи маҳсулотлари ишлаб чиқариш эса 54,3 фоизга ўсиб, 280,9 минг тоннани ташкил этган.

Электр энергияси ишлаб чиқариш ҳажми 4,7 фоизга кўпайиб, 22,93 миллиард кВт/соатга етган. Портландцемент ишлаб чиқариш ҳам ўсиш қайд этиб, 4,1 миллион тоннага чиққан.

Nigina Zarqarayeva

«ZAMIN.UZ» муҳаррири

+ Zamin.uz сайтини Googleга қўшинг