2025 йил якунларига бағишланган энг яхши смартфонлар рейтинги эълон қилинди. Бу галги рўйхатда қурилмаларнинг тоза қуввати эмас, балки унумдорлик, автономлик ва сунъий интеллект (СИ) асосида ишлайдиган ақлли функциялар асосий мезон сифатида баҳоланди. Натижада технология ва амалий қулайликни уйғунлаштирган моделлар етакчи ўринларни эгаллади.
Android платформасида Samsung Galaxy S25 Ultra ҳақиқий эталон сифатида тан олинди. Янги авлод Snapdragon 8 Elite чипи билан жиҳозланган ушбу смартфон юқори тезлик, барқарор ишлаш ва контент яратишни анча соддалаштирадиган СИ функциялари билан ажралиб туради. Расм ва видео таҳрири, матн билан ишлаш ҳамда кундалик вазифаларда сунъий интеллект ёрдами айниқса сезиларли.
Apple ҳам ўз позициясини мустаҳкамлаб қолди. Компаниянинг янгиланган флагмани янги дизайн ечимлари, яхшиланган автоном ишлаш вақти ва 8 карра оптик зумга эга илғор камера модули билан тақдим этилди. Мутахассислар Apple смартфонини мувозанатли экотизим ва барқарорлик тимсоли сифатида баҳоламоқда.
Google Pixel 10 Pro XL эса дастурий таъминот соҳасида рақобатчиларидан илгарилаб кетди. Tensor G5 чипи махсус равишда ресурс талаб қиладиган сунъий интеллект вазифалари учун ишлаб чиқилган. Бу эса Camera Coach каби ноёб СИ ёрдамчисини амалга оширишга имкон берди. У фойдаланувчига суратга олиш пайтида тўғри ракурс, ёруғлик ва кадр бўйича маслаҳат беради.
OnePlus 15 энг мувозанатли смартфон сифатида эътироф этилди. Snapdragon 8 Gen 5 Elite процессори ва 7300 мА·соат сиғимли аккумулятори туфайли қурилма икки кунгача қувват олмасдан ишлаши мумкин. Бу эса фаол фойдаланувчилар учун жуда катта устунлик ҳисобланади.
Йилнинг энг яхши камерали смартфони унвони эса Xiaomi 15 Ultraга насиб этди. У 200 мегапикселли перископ линзасига эга илғор оптик тизим билан жиҳозланган. Смартфон сифати йўқотилмасдан 28 карра яқинлаштириш имконини беради ва тунги суратга олишда янги даражани намоён қилади.
Хулоса қилиб айтганда, 2025 йил смартфон бозорида сунъий интеллект ҳал қилувчи омилга айланди. Қурилмалар энди фақат қувватли эмас, балки фойдаланувчини тушунадиган, унга ёрдам берадиган ва кундалик ҳаётни енгиллаштирадиган ақлли ҳамроҳга айланмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
