Crocs компанияси Lego билан ҳамкорликда ноодатий дизайнга эга янги оёқ кийимларни тақдим этди. Улар одатий Crocs’лардан кескин фарқ қилади: пойабзалнинг олд қисми анъанавий юмалоқ шаклда эмас, балки тўртбурчак кўринишда ишланган. Бу ечим уни Lego ғиштлари кўринишига яқинлаштиради ва дизайнни дарҳол таниладиган қилади.
Пойабзалнинг юқори қисмида конструкторга хос бўлган тўртта ҳажмли элемент жойлаштирилгани айтилади. Бу деталь ҳам Lego руҳини кучайтиради ва фойдаланувчига “конструктордан чиққандек” кўриниш беради. Яна бир қизиқарли жиҳат — пойабзал билан бирга мини-фигура ҳам тақдим этилиши бўлиб, у ҳам ўзининг кичик пойабзалларига эга экани қайд этилмоқда.
Ҳозирча ишлаб чиқарувчилар пойабзал қайси материаллардан тайёрлангани ва у кундалик кийишда қанчалик қулай бўлиши ҳақида батафсил маълумот бермаган. Шунга қарамай, янги ҳамкорлик маҳсулоти дизайни билан аллақачон эътибор тортиб, ижтимоий тармоқларда муҳокамаларга сабаб бўлмоқда.
“Zamin”ни Telegram'да ўқинг!
