Estoniyaning Moliyaviy razvedka bo‘linmasi (FIU) Zondacrypto brendi ostida faoliyat yurituvchi BB Trade Estonia OÜ kompaniyasining litsenziyasini qisman to‘xtatib qo‘ydi. Ushbu qarorga ko‘ra, kompaniyaga yangi mijozlarni qabul qilish va depozitlar olish taqiqlandi, biroq amaldagi foydalanuvchilar o‘z mablag‘larini yechib olish imkoniyatiga ega. Bu haqda Cointelegraph.com xabar beradi.
Regulyatorning ta’kidlashicha, kompaniya belgilangan qonunchilik talablariga rioya qilishi uchun 30 kun muddatga ega. Agar ushbu muddat ichida kamchiliklar bartaraf etilmasa, FIU kompaniyaning faoliyat yuritish litsenziyasini butunlay bekor qilishga majbur bo‘ladi. Hozircha qoidabuzarliklarning aniq tafsilotlari oshkor etilmadi.
Zondacrypto atrofidagi vaziyat so‘nggi paytlarda murakkablashib bormoqda. Xususan, birjaning sovuq hamyonlaridan birida saqlangan qariyb 4500 Bitcoin (taxminan 345,9 million USD) mablag‘dan foydalanish imkonsizligi va foydalanuvchilarning mablag‘ yechishdagi muammolari jiddiy xavotirlarni keltirib chiqardi.
Bundan tashqari, Estoniya Moliyaviy nazorat boshqarmasi (FSA) avvalroq kompaniyaning "TeamPL" kripto-tokeni Yevropa Ittifoqining MiCA qoidalarini buzganligi haqida ogohlantirish bergan edi. Hozirgi vaqtda CoinGecko ma’lumotlariga ko‘ra, birjada savdo faolligi deyarli kuzatilmayapti va kompaniya vakillari bilan bog‘lanish imkonsiz bo‘lib qolgan.
“Zamin”ni Telegramʻda oʻqing!
