O‘zbekiston Prezidenti Shavkat Mirziyoyev 3-noyabr kuni 2025–2026-yillarga mo‘ljallangan Narkojinoyatlarga qarshi kurash bo‘yicha Milliy dasturini tasdiqladi. Ushbu dastur narkomaniyaning oldini olish, giyohvand moddalar noqonuniy aylanmasini tugatish hamda aholi, xususan, yoshlar salomatligini himoya qilishga yo‘naltirilgan 100 dan ortiq amaliy tadbirlarni o‘z ichiga oladi.
Prezident narkojinoyatlar jiddiy tahdidga aylanganini ta’kidladi: yil boshidan buyon O‘zbekistonda 11 mingdan ortiq jinoyat aniqlangan, 2,5 tonnaga yaqin giyohvand moddalar musodara qilingan. Davlat rahbari shaxsiy ma’lumotlarni himoya qilish tizimini yaratish, shubhali bank hisoblarini bloklash va fuqarolarni firibgarlar tomonidan rasmiylashtirilgan mikroqarzlardan xalos qilish bo‘yicha topshiriq berdi.
Shuningdek, Ichki ishlar vazirligi qoshidagi kiberxavfsizlik markazi faoliyati kuchaytiriladi, jinoyatlarni tezkor fosh etish uchun yangi ekspertizalar joriy etiladi. Yana bir yo‘nalish — prokuror nazoratini raqamlashtirish.
Mirziyoyev jinoyatlar ro‘yxatga olinishidan tortib, sud qarori ijrosigacha bo‘lgan jarayonni elektron shaklga o‘tkazish va ishlarni tahlil qilishda sun’iy intellektdan foydalanishni topshirdi. Bundan tashqari, huquqni muhofaza qilish organlari samaradorligini oshirish maqsadida sun’iy intellekt, kiberhuquq va raqamli huquq bo‘yicha mutaxassislar tayyorlanishi boshlanadi.
Mehmon guruhidagi foydalanuvchilar ushbu nashrga izoh qoldira olmaydi.
