19 dekabr kuni soat 10:39da Afg‘onistonning Taxor viloyati hududida 6 ball kuchiga ega zilzila qayd etildi. Yer silkinishining epitsentri Toshkentdan taxminan 551 kilometr janubiy-sharqda joylashgan.
O‘zbekiston Seysmoprognostik monitoring markazi ma’lumotiga ko‘ra, zilzila mamlakatning bir qator hududlarida turli darajada sezilgan. Eng kuchli tebranish Surxandaryo viloyatida kuzatilib, u yerda 4 ballga yetgan. Qashqadaryo va Samarqand viloyatlarida yer silkinishi 3 ball atrofida bo‘lgan.
Jizzax, Sirdaryo va Farg‘ona viloyatlarida zilzila 2–3 ball darajasida sezilgan. Navoiy viloyati, Toshkent shahri, shuningdek Namangan va Andijon viloyatlarida esa 2 balllik yer tebranishlari qayd etilgan.
Ayni paytgacha fuqarolar hayoti yoki infratuzilmaga jiddiy zarar yetgani haqida rasmiy ma’lumot berilmadi. Vazirlik va tegishli xizmatlar vaziyatni nazorat ostida ushlab turibdi. Yer silkinishlari xavfi saqlanib turgan bir paytda, mutaxassislar aholini xotirjamlikni saqlashga va xavfsizlik qoidalariga amal qilishga chaqirmoqda.
Mehmon guruhidagi foydalanuvchilar ushbu nashrga izoh qoldira olmaydi.
